DISTINCTIO XXXVII.

Sunt quidam Ordines etc. *. Nota, sicut habetur in his capitulis, quod Ordo sacer impedit matrimonium contrahendum et dirimit contractum. Super quo quaestio est, cum Ordo ponatur unum de impedimentis, utrum Ordo de se, aut ratione voti annexi, impediat matrimonium.

a. Quod non de essentia Ordinis, patet: semper enim fuisset tunc impedimentum et ubique. Non autem semper fuit impedimentum nec est ubique ; ergo non est de essentia Ordinis.

b. Si vero est de voto annexo, tunc non sunt duo impedimenta votum et Ordo. - Praeterea, si est ibi votum, non videtur esse nisi simplex : non enim ore exprimit se vovere continentiam. Sed votum simplex, licet impedit contrahendum, non dirimit contractum, ut infra, proxima distinctione, cap. 1 [967, 24-28 ]. Ergo non propter hoc esset divortium celebrandum inter tales personas.

c. Si vero dicatur quod hoc sit ex prohibitione episcopi, non videtur. Si enim interdiceret Ecclesia alicui ne contraheret cum aliqua, nihilominus si essent legitimae personae et contraherent ad invicem, de facto contractum esset, ut habetur in Secundis, De matrimonio contracto contra interdictum Ecclesiae, Cum sis praeditus , ubi dicitur: " Si contrahentium voluntas propria suffragaverit et legitima vota succurrerint, licet ab initio tale matrimonium non tenuerit, ex post facto tamen, subsequente utriusque voto legitimo, roboratur; et taliter contrahentes sunt tolerandi, nisi matrimonium fuerit accusatum". Ex quo videtur quod prohibitio non dirimit matrimonium contractum in casu praedicto.

d. Si vero dicatur quod hoc sit ex compromissione quam facit cum ei dicitur ab episcopo : " Si prius,tardi ad ecclesiam, nunc assidui; si somnolenti, amodo vigiles;c si ebriosi, amodo sobrii ; si incesti, amodo casti"; sed hoc non videtur obligare ad votum. Votum enim non fit nisi per expressionem propriam, sicut potest haberi ex definitione voti: "Votum est promissio spontanea " etc. [967, 10-11].

c. Respondemus quod Ordo impedit ex institutione Ecclesiae. Habuit autem hoc Ecclesia auctoritate Domini dicentis: Mundamini, qui fertis vasa Domini, Is. 52,11. Subdiaconi autem est ministrare altari, deferendo calicem et patenam ad altare. Et ita aliud impedimentum est Ordo, aliud votum. Institutio autem ista Ecclesiae non semper fuit, a tempore quo institutus fuit Ordo in Veteri Testamento in figura. Sed hoc elegit sibi Ecclesia occidentalis, ut manentes coniugati non possint promoveri ad sacros Ordines; orientalis autem non. Commune autem est orientali et occidentali, ut in sacris ordinibus ordinati contrahere non possunt deinde, ut patet ex sexta Synodo, quae in Oriente fuit celebrata, ut habetur 31 distinctione et 33, ubi dicitur: Nicena Synodus et Aliter se habet Orientalium traditio etc. A tempore autem Siricii non licuit occidentalibus ad subdiaconatum vel supra promoveri, nisi promissa continentia, ut 82 distinctione, Proposuisti . Et ita Ordo sacer a tempore Apostolorum impedit et dirimit matrimonium post contractum. Sed aliquando subdiaconatus non fuit Ordo sacer, et tunc obligabat sicut et nunc.

f. Est autem promissio continentiae cum verbo, tum facto. Verbo, ut quando vovet; facto, ut in susceptione Ordinis. Eo enim quod se obligat ad tractandum vasa ad ministerium consecrationis, ipso facto obligat se ad continentiam acsi vovisset.

g. Nec est simile de prohibitione Ecclesiae et institutione. Ex institutione enim possunt esse illegitimae personae ad contrahendum et in contractu; ex prohibitione vero ad contrahendum, sicut habetur libro quarto Primarum, De matrimonio contracto contra interdictum Ecclesiae, cap. 1 et 2 .