DISTINCTIO XIV (ae).

Hic quaeri opus est etc. *. Hieronymus : "In infantilibus membris anima rationalis miro modo aggravatur ignorantia, quam nullo modo credidero esse in eo in quo Verbum caro factum est". - [C o n t r a]: cum pueri habeant cerebrum humidum, ideo videtur quod de facili accipiunt et cito amittunt. - Dicendum quod hoc verum est, nisi aliquid aliud esset in causa; bene autem retinent, quoniam ipsi avidi sunt novarum formarum; avidi autem sunt novarum formarum propter vehementem admirationem in illis.

Videtur quod Christus profecit in scientia. (Super) Ezechielem : In terra nobiscum didicit. 5 Hebr., 8: Ex iis quae passus est didicit, Glossa dicit quod didicit per experientiam quod prius alio modo scivit.

Scientia qua omnia scit est donum gratis datum, et ita est habitus; et illa scientia quam habet per experientiam est habitus in anima: quaeratur utrum idem habitus numero vel diversus. - Constat quod diversus, quoniam unum fit ex multiplici dispositione praecedente, et alterum fit subito; relinquitur ergo quod non idem.

Dubium potest esse utrum Christus simul novit. A ugustinus, XII Confessionum : In caelo intelligibili "intellectus est simul nosse, non in parte, non in aenigmate, non vicissitudine, non in speculo, sed simul omnia ".

[Utrum omnia sciat quae Deus scit, 607, 22-23]. Hugo de S.Victore : Aequalis est scientia animae Christi et Dei, quoniam " sua anima habet per gratiam quidquid Filius Dei habet per naturam ". Et ita tot scit, quot ipse Deus vel Filius Dei.

Utrum Christus secundum quod homo aliquam scientiam recepit ab angelis, sicut nos recipimus. Quod videtur. Dionysius, in Hierarchia : "Per angelos videmus ipsum sub paternis legislationibus ordinatum". - Dicendum quod ipse fuit ordinatus per angelos sub paternis legislationibus, quoniam ipsi annuntiaverunt adventum ipsius ; sed non dederunt ei scientiam, quoniam ipse, qui angelos portat, non indiget ut portetur (= d. 13, n. 38).

Utrum (Christus) secundum quod homo docuit angelos vel docere potuit. Quod non, videtur, quoniam angelica natura est supra humanam.

Contra, Dionysius, in Hierarchia : "Praelargitur eis scientiam, suam humanam benignitatem manifestantem" (= d. 13, n. 39).

8. Utrum in Christo sit scientia deliberativa et electiva Ioannes Damascenus : "In anima Christi non inquimus consilium vel electionem. Non enim habuit ignorantiam, etsi ignorantis naturae haec erat, sed tamen secundum hypostasim unitam Deo Verbo habuit omnium cognitionem: non gratia, sed, ut dictum est, propter eam quae secundum hypostasim est unitionem" . - Dicendum quod scientia deliberativa dupliciter est: aut enim prout est in termino, et sic est in Christo ; aut prout est in via ad terminum, et sic non est in Christo.

Ex persona hominis assumpti *. Ambrosius : "Nemo, neque Filius secundum humanum sensum illum novit". - Contra, Isidorus : " Sibi soli Trinitas nota est et homini assumpto ".

Dicendum quod secundum sensum humanum qui est experientia nemo cognovit.

Quibus respondentes etc. *. Hugo de S. Victore : "Hoc unum scio et indubitanter affirmo, quod aut alia scientia praeter divinam in anima Christi non fuit, aut si alia fuit, aequalis illi non fuit". Item, Hugo : Anima Christi est aeque sapiens ut Deus, nec tamen aequalis Deo in sapientia, quoniam anima habet sapientiae plenitudinem.

Sed dubium potest esse qualiter fuit aeque sapiens, non tamen aequalis in sapientia.

Ad quod sciendum quod 'aeque' dicitur sapiens, quoniam tot scit; sed non 'aequalis' dicitur, quia Deus clarius et limpidius scit quam anima Christi, quoniam ' Filius Dei habet per naturam hoc quod anima Christi habet per gratiam " (= n. 17).

Utrum anima Christi uno aspectu scivit omnia, an discurrendo ab uno ad aliud. Augustinus, XV De Trinitate : "Fortasse non erunt cogitationes volubiles, de aliis ad alia euntes et redeuntes, sed omnem scientiam nostram uno aspectu videbimus". Cum ergo Christus erat comprehensor in via, maxime sub uno aspectu scivit (= n. 19).

Utrum anima Christi habuit limpidissimam scientiam. Quod videtur, cum sua scientia nihil fuit permixta cum suo opposito, scilicet cum ignorantia. Unde clarissime scivit quod penitus sine ignorantia fuit.

Dicendum quod perspicuitas scientiae dicitur dupliciter, scilicet secundum impermixtionem sui oppositi, et hoc vel privationis, ut ignorantia ; vel negationis, ut nescientia (= n. 20).

Sed sine mensura scientiam habuit [609,5-6]. Super illud: Dignus est Agnus, 5 Apoc, 12 : " Omnium rerum cognitionem habuit, sicut Verbum sibi unitum " ergo scit creare mundum. - Anima Christi habuit scientiam cognitivam omnium, sed non habuit scientiam operativam omnium ; unde non habuit scientiam operativam creandi omnia, quidquid dicat Magister . - Ioannes Damascenus : "Rationalis hoc contemplativum est, illud vero activum. Contemplativum quidem, quod excogitat qualiter se habent entia: activum autem, quod determinat in actibus rectam rationem. Et contemplativum autem sapientiam habet, activum vero prudentiam " (= n. 22).

Quaeritur utrum Christus secundum quod homo habuit voluntatem ad omnia, sicut scientiam. - Dicendum quod habuit scientiam operativam, sed non ad omnia; et haec coniuncta est voluntati. Unde, cum operativam non habuit ad omnia, nec voluntatem ad omnia habere potuit (= n. 23).

Anima rationalis est vestigium Trinitatis, et hoc tam quoad potentiam, quam quoad scientiam; et ita aeque erit capax potentiae Dei sicut scrientiae.

Dicendum quod scientia non ponit causalitatem aliquam ipsarum rerum sicut omnipotentia ; ideo creatura potest recipere omnem scientiam Dei, sed non potest recipere omnipotentiam Dei (= n. 24).

Sed si anima etc. * ; illam potentiam *. Anselmus : Summum bonum non potest facere aliquid potentius se, et hoc non est ei impotentia (= n. 23).