ARTICULUS I.

PONITUR DETERMINATIO SANCTI THOMAE Quantum ad primum articulum, advertendum est quod ista quaestio non est principaliter mota ad inquirendum : Utrum materia prima sit de se et per suam essentiam formaliter ens actu; quia, de hoc, alias (dist. 13) visum est quod non est actus, nec composita intrinsece ex actu, nec est suum esse, nec est per se subjectum actus essendi. Sed principaliter ad hoc introducta est, ad videndum : Utrum materia rei corporalis sit entitas distincta a forma, per quam actuatur; ita quod possit veraciter dici quod haec distinguitur ab illa, et nullo modo est illa, nec pars nec aliquid ejus. Et circa hoc pono talem Conclusionem : Quod materia rei corporalis essentialiter distinguitur a qualibet iorma substantiali. Probattir ista conclusio, secundum mentem beati Thomae,

Primo sic. Quidquid potest stare cum aliquibus essentialiter distinctis successive, non est idem alicui illorum, sed a quolibet illorum distinguitur. Sed materia prima potest stare cum formis essentialiter distinctis, puta cum forma ignis et terrae, cum forma elementi et mixti, cum forma animati et inanimati. Igitur a qualibet illarum distinguitur.

Secundo sic. Quidquid est indifferens ad aliquam formam et ejus privationem, essentialiter distinguitur a quolibet illorum. Materia prima est hujusmodi, circa formam substantialem et ejus privationem. Igitur, etc.

Tertio. Quidquid componit cum alio essentialiter, est aliud essentialiter ab illo. Sed materia prima componit cum forma substantiali essentialiter, scilicet compositum substantiale. Igitur est aliud essentialiter a forma.

Quarto sic. Ens in pura potentia, non est idem nec potest identificari illi quod secundum suam essentiam est actus. Sed materia, secundum suam essentiam, est ens in pura potentia; forma vero, secundum suam essentiam, est actus. Igitur unum nullo modo potest alteri identificari. Igitur, si quodlibet illorum aliquo modo est actus, per se vel per aliud, oportet quod actu distinguantur, etsi non ut duo actus, saltem ut potentia et actus, vel potentia sub actu.

Quinto. Causa et effectus realiter distinguuntur. Materia et forma se habent hujusmodi. Igitur distinguuntur.

Sexto. Quaecumque sunt duo principia, sunt duo distincta. Materia et forma sunt hujusmodi. Igitur.

Septimo. Quidquid praecedit aliud duratione, distinguitur ab eo. Materia prima praecedit formam duratione. Igitur.

Octavo. Quidquid subjicitur alteri, distinguitur ab illo. Materia subjicitur formae. Igitur. - Nono. Omne quod est per se ingenerabile et incorruptibile (a), distinguitur ab omni generabili et corruptibili. Sed materia prima est per se ingenerabilis et incorruptibilis, tanquam terminus generationis et corruptionis; forma vero est generabilis et corruptibilis, saltem tanquam terminus generationis et corruptionis. Igitur materia distinguitur a forma essentialiter. Et cum utrumque sit aliquo modo actu, per se vel aliud, quodlibet distinguitur ab alio actu. Omnes istae rationes sunt de mente beati Thomae, ut patet ex praecedentibus quaestionibus. Et in hoc primus articulus terminatur. :. - QUAESTIO I.