ANNOTATIONES

(a) Motus contrariatur quieti in termino a quo . Nota, quod omnis motus est contrarius quieti, quae est sub termino a quo : verbi gratia, motus sursum est contrarius quieti quae est deorsum, et motus calefactionis contrariatur quieti, quae est sub frigiditate. Nam motus contrariatur quieti ejusdem generis motus ; vel ergo quieti quae est sub termino ad quem, vel quieti, quae est sub termino a quo : non quieti sub termino ad quem, quia contraria non simul acquiruntur ; motus autem et terminus ad quem, et quies sub termino ad quem, simul acquiruntur : ergo motus contrariatur quieti, quae est sub termino a quo. Dixi notanter, molles contrariatur quieti ejusdem generis, quia contraria debent esse ejusdem generis; modo quies et motus opponuntur in radice contrarietatis, scilicet privative. Unde motus dealbationis non opponitur quieti in sanitate, sed quieti in nigredine.