ANNOTATIONES

(a) Omne corpus naturale naturaliter movetur, etc. Nota, quod ratio quare corpus naturaliter fertur ad suum locum, est, quia cum locus sit terminus continentis locatum, illud corpus continens, ad quod consequenter, et contigue se habet locatum, quia se tangunt terminis, id est, superficiebus simul existentibus ; et hoc non per violentiam, est proximum secundum naturam locato. Hoc inde apparet, quod ordo situs in partibus universi attendi debet secundum ordinem naturae : ergo corpus illud, quod non VI, id est, non violenter se habet, consequenter secundum situm ad aliud corpus est secundum ordinem naturae sibi proximum. Unde, cum corpus caeleste, quod est supremum, atque nobilissimum omnium, quod sequitur secundum ignobilitatem ignis, et ignem aer, et aerem aqua, et aquam terra naturaliter, fatendum est, quod locus proprius ignis est caelum, et locus proprius aeris est ignis, et locus aquae est aer, et terrae aqua.

Et ex hoc apparet,quare projectus sursum lapis super aerem, vel super aquam,non ibi sistat nisi violenter.Ratio est, quia sibi non est proprius locus : haec enim proximitas naturalis, quae est inter corpus continens et contentum, est causa, quare corpus naturaliter movetur ad suum locum ; quia oportet, quod gradus naturalium locorum respondeant gradui naturalium locatorum) et quamvis sic se tangant naturaliter, tamen quia aliunde habent oppositionem ratione contrariarum qualitatum, ideo mutuo in se agunt, et se corrumpunt. (b) Omne corpus naturale existens in loco, etc. Nota, quod ex eo corpus naturaliter quiescit in suo loco naturali,quia locus est . terminus continentis, eo quod locatum se habet ad corpus continens, sicut pars ad suum totum, quamvis divisa, et sicut materia ad formam, atque adeo sicut pars quiescit in suo toto, ita locatum in loco proprio. Quare autem se habeat sicut pars ad lotum, et sicut materia ad formam, declarat in aere, et in aqua. In his enim aqua est in potentia ad aerem, sicut materia ad formam, et aer est veluti actus aquae, sicut forma materia. Hoc dicit, quia aqua est in potentia, ut ea corrupta, generetur aer ; et quamvis etiam ex aere fiat aqua, tamen quia principalior forma est aeris, quam aquae, ideo quando ex aqua fit aer, est simpliciter generatio ; quando vero ex aere fit aqua, est generatio secundum quid, quia est ad ignobiliorem formam.