JOHANNIS CAPREOLI THOLOSANI ORDINIS PRAEDICATORUM, THOMISTARUM PRINCIPIS
DEFENSIONES THEOLOGIAE DIVI THOMAE AQUINATIS In Primo Sententiarum
ARTICULUS UNICUS A. - CONCLUSIONES
UTRUM ESSENTIA DIVINA SIT OBJECTUM ADAEQUATUM SUI INTELLECTUS TERUM circa eamdem distinctionem quaeritur : Utrum essentia divina sit objectum adaequatum sui intellectus. Et arguitur quod non. Deus cognoscit alia a se; igitur quaestio falsa. Antecedens patet ex fide. In oppositum arguitur sic. Actus cognitivus sumit distinctionem et speciem ab objecto, et dependet ab ipso quodammodo, ut patet, 2. de Anima (t. c. 33.). Sed divinus intellectus non dependet ab aliquo extra se. Igitur objectum illius intellectus non est aliquid extra se; et sic, quaestio vera. In hac quaestione erunt duo articuli. In primo, videbitur de objecto divini intellectus. In secundo, videbitur de conditionibus divinae scientiae.