ET QUAESITUM PRIMUM.

De Principatibus, quid sint ?

Ad primum objicitur sic:

1. Gregorius in Homilia de centum ovibus dicit sic: " Principatus vocantur qui ipsis quoque bonis Angelorum spiritibus praesunt, qui subjectis aliis dum quaeque sunt agenda disponunt, eis ad explenda divina ministeria principantur. " Ex hoc accipitur, quod Principatus alios Angelos inferiores illuminant ad ministeria, et disponunt quaeque agenda: converti autem per illuminationem, est mediae hierarchiae, et non infimae: ergo videtur, quod Principatus sint de media hierarchia, et non infima, quod est contra Dionysium.

2. Adhuc, Gregorius in eadem Homilia: " Sunt nonnulli qui acceptis virtutibus etiam electorum hominum merita transcendunt: cumque bonis meliores sint, electis quoque fratribus principantur. Quo ergo isti sortem suam nisi inter

Principatuum numerum accipiunt ? " Ex hoc accipitur, quod Angeli meliores qui inferioribus praesunt et agenda disponunt, Principes vocantur: sicut meliores fratres boni praelati, principes eorum dicuntur. Et ex hoc sequitur idem quod prius, scilicet quod sint de media hierarchia.

3. Adhuc, Bernardus in sermone 19 super Cantica : " Sunt Principatus, qui Deum altius speculantes, et liquido praevidentes universitatis esse principium, et primogenitum omnis creaturae, tanta proinde principatus dignitate dominantur, ut ubique terrarum habeant potestatem quasi de summo quodam rerum cardine regna et principatus et quaslibet pro arbitrio mutare et ordinare dignitates, pro quocumque meritis facere primos novissimos, et novissimos primos: deponere potentes de sede, et exaltare humiles. " Ex hoc accipitur, quod Principes illuminationem accipiunt a summo rerum cardine, qui est Deus: converti autem immediate in Deum primae hierarchiae est: ergo Principes debent esse de prima hierarchia.

4. Adhuc, In eodem sermone sic dicit: " A Principatibus Deus diligitur ob aeternam et originalem virtutem qua dat esse et essendi principium omni creaturae superiori et inferiori, spirituali et corporali, attingens a fine usque ad finem fortiter, et disponens omnia suaviter. " Ex hoc accipitur, quod, illuminatio quae ponit Principatus in gradu et ordine, est contemplatio virtutis creatricis: et haec non est illuminatio ad Principatus nec ad constitutionem Principatuum vel ordinem: et ita videtur Bernardus esse contrarius Gregorio.

5, Adhuc, Bernardus in libro V de Consideratione ad Eugenium: " Putemus Principatus, quorum moderamine et sapientia omnis in terris principatus constituitur, regitur, limitatur, transfertur, mutilatur, mutatur. ". Ex hoc accipitur, cum Angeli illuminationem ad id accipiant ut agant ex, officio, quod non a contemplatione virtutis dantis esse accipiunt illuminationem, sed a contemplatione gubernantis principii et disponentis principatus, sicut dicitur, Daniel, iv, 29: Scias quod dominetur Excelsus in regno hominum, et cuicumque voluerit det illud, etiam humillimum hominem constituet super illud. Et hoc etiam patet per hoc quod dicitur, Daniel, v, 5, ministerio angelico apparuerunt digiti manus scribentis in pariete: Mane, Thecel, Phares, quod est idem, appensum, numeratum, divisum. Quia ministerio angelico appensum est regnum libra justitiae, et inventum est iniquum. Eodem ministerio numeratum est numero scilicet meritorum, et inventum est minus habens, ut ibidem, v. 7, dicitur. Et ideo eodem ministerio angelico divisum est a Chaldaeis, ei datum est Medis et Persis. Ab illuminatione ergo disponente principatus terrenos, Principes dicuntur Angeli.

Quod est concedendum.

Ad primum ergo dicendum, quod Principes bonis Angelis non principantur principaliter ex proprio actu hierarchiae: sed per Angelos inferiores explent ministeria sua circa homines, influendo eis illuminationem a superiori acceptam, et explent officium sicut per vicarium, sicut dicit Dionysius in Caelesti hierarchia , quod Seraphin per inferiorem Angelum sicut per vicarium purgavit labia Prophetae . Et talis conversio super Angelum sive praelationem non facit hierarchiam: quia actus officii sive per se sive per alium exerceatur, actus super homines est, quod ultimae competit hierarchiae.

Ad aliud dicendum, quod non sunt de media hierarchia sed de ultima: quia sicut in antehabitis dictum est, illuminatio ad actus officii sui non est excellens

analogiam illuminationis intelligentiae humanae, et proportionata intelligentiae angelicae: est enim de humanis et ultimae hierarchiae.

Ad aliud dicendum, quod Bernardus determinat Principes ab actu consequente et non primo. Omnium enim Angelorum est perfectionem suae illuminationis referre in Deum, et contemplari, quod secundum summum cardinem rerum, qui est sapientia Dei, actus hierarchicus sit consummatus. Et talis conversio in Deum omni hierarchiae convenit, tam angelicae, quam humanae. Nec talis conversio sive contemplatio facit illuminationem manifestationis primae, vel secundae, vel tertiae: quia omnibus convenit, et ideo secundum eam hierarchiae non distinguuntur.

Ad aliud dicendum, quod contemplatio virtutis creatricis duobus modis est, scilicet virtutis simplicis: et sic non admiscetur ei contemplatio Principatuum. Est etiam contemplatio virtutis non simplicis, sed moderantis et disponentis creata secundum dignitatem et gradus creatorum: et sic contemplatio virtutis creatricis illuminat ad constitutionem Principatuum.

Quod ultimo objicitur, concedendum est: quia recte veritatem hujus solutionis concludit: et sic patent ista.