DUBIUM.

Sed in hoc est dubitatio.

1. Quoniam eis nihil nocet : et ita non convenit eis discretio convenientis et nocentis.

2. Praeterea, Tactus est secundum ultima quae sunt simul : sed Deus non habet ultimum : ergo non potest esse tactus Angeli ad Deum.

3. Praeterea, Tacta adhaerent sibi : sed nihil exaltatur usque ad Deum : ergo non potest intelligi tactus Angeli ad Deum.

4. Praeterea, Ut dicit Philosophus, " fn " tactu naturali utrumque imprimit in alterum : " sed Deus nihil recipit ab Angelo : ergo, etc.

5. Praeterea, Tactus est discretivus dissimilis : sed omnes Angeli sunt deiformes, ut saepe dictum est: ergo non est tactus Angeli ad Deum.

Solutio. Quid dicatur hic actus, dictum est prius.

Unde dicendum ad primum, quod licet non discernant nocens per experimentum, discernunt tamen per scientiam speculativam.

Ad secundum dicendum, quod licet Deus simpliciter non habeat ultimum, habet tamen secundum quid, prout accipitur ab intellectu Angeli.

Ad tertium dicendum, quod Angelus non tangit Deum ut jungatur sibi per aequiparantiam, sed attingit ipsum vivens sub eo.

Ad quartum dicendum, quod in veritate Deus nihil accipit ab Angelo tangente ipsum : sed Angelus recipit a Deo : et ideo in hoc non est simile tactui naturali : sicut si manus tangeret infinite calidum, tota mutaretur ignem, in nullo alterans ipsum.

Ad quintum dicendum, quod quamvis Angeli sint Deo similes, tamen exceduntur ab ipso : et talis similitudo est quae requiritur ad discretionem tactus.