DIVISIO ET EXPOSITIO TEXTUS.

A. Et hoc autem tuam summe sacerdotalem, etc.

In hac parte confirmat solutionem immediate inductam.

Et dividitur in duas partes. In prima confirmat solutionem per exempla sacrae Scripturae. In secunda objicit in contrarium, et solvit, ibi (g 6 B), Sed et eloquium, etc.

Littera sic legatur : Diximus, quod etiam in aliis gentibus aliqui reducti sunt per Angelos, sicut Melchisedech. Autem, id est, sed nos admonebimus tuam sacerdotalem summe intelligentiam, quia sacerdotes supra alios oportet intelligentes esse, hoc, id est, ad hoc, quia providum dominationis, id est, provisa dominatio super alias gentes, et similiter providum potestativum, id est, provisa potestas, distributum est secundum visiones, quibus revelatum est eis a providentia omnium, scilicet divina. Distributum dico, et, id est, etiam apud aegyptios ipsos Pharaoni imperante, id est, illuminante Angelo, ut legitur Gen. xli, et etiam est distributum principi Babyloniorum, scilicet Nabuchodonosor, proprio praeside, id est, per Angelum qui illius regni praeses erat, ut legitur Daniel. ii, de visione

Nabuchodonosor, et ministri veri Dei, non falsorum, sed Angeli sunt statuti a Deo duces illis gentibus, duces dico formationum,id est, revelationum sacrae, ab Angelis, id est, illuminationis : et hoc dico continuo revelatae manifestatione Angelorum, id est, quae per Angelos Pharaoni et Nabuchodonosor factae fuerunt. Revelatae dico ex Deo sacris viris, scilicet Danieli, quoad visionem Nabuchodonosor, et Joseph, quoad visionem Pharaonis : et ideo revelatae sunt etiam aliis gentibus. Enim, id est, quia unum est principium omnium Deus et una providentia omnium populorum : et ideo nullo modo aestimandum est quidem, id est, certe Judaeos pleniter duxisse divinitatem, id est, habuisse totam cognitionem de Deo, ita quod aliis nihil de hoc sit revelatum.

Autem, id est, sed non est aestimandum Angelos praefectos aliis gentibus specialiter, id est, partialiter vel imperfecte respectu Judaeorum : aut etiam aeque honorabiliter ipsis Judaeis habuisse cognitionem de Deo, cum multi melius cognoverunt, aut quod non revelaverint gentibus Deum ut oppositis, id est, inimicis sibi, vel ipsis oppositis dicitur ut nollent eum manifestare, aut non est aestimandum deos quosdam alteros a vero Deo imperare gentibus aliis a Judaeis, cum sit unus Deus omnium.