BALTH. CORDERII, S. J. INTERPRETATIO.

Sanctorum vero archangelorum ordo, caelestibus quidem istis principatibus aequalis perhibetur.Est equidem, uti dixi, una illorum atque angelorum hierarchia, eademque distinctio ; verum cum nulla sit hierarchia, quae non primas et medias ultimasque virtutes habeat, sanctus Archangelorum ordo, jure quodam hierarchico communi, medietate sua continet extremas ; sanctissimis enim principatibus communicat et sanctis angelis ; illis quidem, quoniam ad superessentialem principatum principaliter conversus est, et ad ipsum, quantum fas est, efformatur, nec non Angelis decoro suo atque ordinato, qui adspectum effugit, ducatu unionis auctor exsistit ; his autem, quia etiam ordinis est dictatorii, divinasque illustrationes hierarchice per primas virtutes suscipiens,exinde iis ipsis Angelis easdem benevole annuntiat, nobisque per Angelos manifestat, pro cujusque illorum., qui divinis illustrationibus afflantur, ad res sacras capacitate.