DUBIUM.

Sed hic est dubium de hoc quod dicit quosdam esse perfectos per medium.

1. Quod enim per medium cognoscit Deum, symbolo et simili cognoscitDeum : si enim non cognoscit per se, cum non possit cognoscere per causam vel perfectam rationem, non relinquitur cognoscendi modus nisi per similia: si igitur per medietatem Angeli perficiuntur a Deo, ut hic dicitur, videtur quod cognoscunt per symbola, quod est contra sanctos.

- 2. Praeterea, Sicut dicit Philosophus, " de extremo non pervenitur in ultimum " nisi per medium quod non est alterum " extremorum. " Si igitur Angeli mediae hierarchiae veniant de imperfectione quam habent ex natura in contemplationem Dei : ergo oportet,quod per aliquod medium quod non est Deus : et hoc est symbolum : ergo cognoscunt per symbola.

3. Praeterea, Duae sunt visiones Dei, scilicet per speciem, quae est facie ad faciem, et per speculum, quae est per symbola. Et primam non habent illi de media hierarchia, quia non immediate ab eo recipiunt : videtur, quod habeant alteram, quae est per symbola.

4. Praeterea, Duplex est intelligibile in nobis, scilicet simplex quo res per se videtur, et quod accipitur a phantasmate : cum igitur dicti Angeli non videant Deum per modum primi intelligibilis, quia mediantibus aliis et non per se vident, vide-

tur quod videant sub phantasmate, et ita per symbola.

Solutio. Dicimus, quod sicut saepe dictum est, quantum ad ea quae pertinent ad beatitudinem, Deus immediate ab omnibus videtur ; superiores tamen quia sunt magis capaces et propter naturalem perspicacitatem et propter nobilius donum, capiunt ipsa beata visione quasdam illuminationes de pertinentibus ad gubernationem mundi et utriusque Ecclesiae, quas inferiores per se capere non possunt, nisi in quantum illuminantur per lumen receptum in superioribus effulgens in ipsis, et non cognoscunt per symbola.

Ad primum ergo dicendum, quod est duplex simile, scilicet assimilans, sicut lumen assimilat oculum naturae coloris, quae causatur ex lumine ut possit color relucere in ipso : et tale simile recipiunt Angeli. ab his quibus mediantibus perficiuntur, recipientes ab ipsis lumen quo confortantur ad contemplanda divina. Est etiam simile in quo manifestatur objectum, sicut similitudo coloris recepta in oculo : tale autem simile non recipiunt per primos quo divina inspiciant : et ideo non cognoscunt symbolis, cum solum tale simile symbolum dicatur.

Ad secundum dicendum, quod verum est quando est discursus intelligibilium acceptorum sub diversis rationibus ad conclusionem unam, quia tunc oportet esse cognitionem per medium quod non est ultimum : sed in contemplatione angelica est status in uno intelligibili, scilicet Deo sicut in fine : et ideo non cognoscunt per medium quod non sit ipse.

Ad tertium dicendum, quod licet recipiant per alios lumen quo intellectus eorum confortatur in contemplatione Dei, non tamen recipiunt per eos aliquod simile in quo manifestetur Deus, sed ipse per se eis objicitur : et ideo habent cognitionem quae est per speciem, et non quae est per speculum. Et simile dicendum ad quartum, quod omnes vident per modum intelligibilis simplicis.