DUBIUM,

Hic est dubitatio.

1. Videtur enim, quod possibile sit nobis sine revelatione cognoscere dispositiones angelicas. Philosophi enim per principia naturaliter cognita scripserunt de substantiis separatis sine revelatione, tam Plato qui posuit calodoemones et cacodamon.es , quam Aristoteles qui in Xl primae philosophiae posuit numerum eorum secundum numerum motuum : ergo videtur, quod sine revelatione possibile sit scire.

2. Praeterea, Si alterum eorum ex quibus componitur aliquid, invenitur per se, et reliquum potest per se inveniri, sicut si medo componitur ex aqua et melle, et mel invenitur per se, et aqua similiter : sed corpus ex quo et spirituali substantia homo componitur, invenitur per se, ut in inanimatis : ergo et spiritualis substantia separata invenitur : et sic ad cognitionem Angelorum per rationem devenire poterimus .

3. Praeterea, Sicut dicit Philosophus, " intellectus noster est in potentia ad unumquodque intelligibile, dummodo non sit sibi improportionatum propter Infinitatem : " Angelus autem est intelligibile proportionatum nostro intellectui, cum non sit infinitum : ergo poterit per se illud cognoscere : etsi non cognoscat, cum sint multa scibilia quorum scientiam non habemus, ut dicit Philosophus.

Solutio. Dicimus, quod impossibile est nobis sine revelatione venire in cognitionem Angelorum, secundum quod ponimus eos non determinatos ad motum, servientes Deo in spiritualibus obsequiis beatitudinis : omnis enim nostra cognitio ortum habet a sensu secundum Philosophum : unde cognitio nostra non extendit se ultra sensibilia propria, sicut sunt passibiles qualitates, aut communia, sicut motus, numeros, magnitudo, et hujusmodi, aut sensibilia secundum accidens, quae aliquo modo conjunguntur sensibilibus, cujusmodi sunt formae substantiales et relationes, et similia,.

Ad primum ergo dicendum, quod Plato posuit illos calodaemones corporeos, et in horum etiam cognitionem per philosophiam non venit, sed. per daemones, per necromantiam. Unde etiam ipse dicit, quod " cognitio eorum non potest accipi sine revelatione sacrorum delubrorum. " Aristoteles vero venit in cognitionem eorum per motum, secundum quod determinantur ad motum et conjunguntur sibi, et ita habent aliquem ordinem ad sensibilia : sed ita nos non ponimus Angelos.

Ad secundum dicendum, quod per hoc quod corpus invenitur per se, non necessario venitur nisi in spiritualem substantiam, quae componibilis est corpori : et hujusmodi non est Angelus : sicut etiam per mel non veniretur in compositionem aquae nisi aqua esset componibilis melli.

Ad tertium dicendum, quod intellectus noster est in potentia tantum ad ea quae per sensibilia accipi possunt, sed ad spiritualia proportionaliter per aliquod lumen superadditum naturae, scilicet gratiae, vel gloriae.

3