DUBIUM.

Sed secundum hoc est dubitatio : quia clamor est propter distantiam, aut propter malum auditum : hoc autem non est in Seraphin : ergo videtur, quod unus non clamet ad alterum.

2. Praeterea, Apud nos clamat superior inferiori, et e converso, et aequalis aequali : ergo cum unus ad alterum clamat, non habetur quod primi tradant secundis.

3. Praeterea, Clamare loqui quoddam est : loqui autem potest quilibet cuilibet: ergo videtur idem quod prius.

4. Praeterea, Homo potest clamare ad Deum. Psal. cxviii, 145 : Clamavi ad te, exaudi me. Ergo, etc..,

Solutio. Dicendum, quod in Angelis clamor non significat aliquod illorum donorum, sed intentionem, sicut dicit Glossa. Similiter ad primum.

Ad secundum dicendum, quod clamor vel locutio potest esse aut de naturalibus conceptis, et sic quilibet cuilibet potest loqui : aut de gratuitis, et hoc dupliciter, aut tradens alteri illuminationem per modum doctrinae, et sic non clamat nisi superior inferiori, et talis fuit ille clamor : aut requirendo illuminationem ab alio, et sic est inferioris clamare ad superiorem, et sic Angelus clamat ad Deum. Zach. I, 12 : Usquequo Domine non misereberis, etc,et homo ad Deum clamat.Et per hoc patet solutio ad alia.