DIVISIO ET EXPOSITIO TEXTUS.

Non ergo prima, etc.

Hic concludit propositum. Et circa hoc tria facit. Primo concludit, quod immediate a Deo purgantur, illuminantur, et perficiuntur. Secundo compendiose manifestat quodlibet eorum per se, ibi, Omnique etc. Tertio reducit ea in unum, ibi, Comprehendens autem.

Littera sic legatur : Ergo non, id est, nonne prima hierarchia caelestium intellectuum, id est, Angelorum, purgatur et illuminatur et perficitur sanctificata, id est, sacris donis repleta ab ipso principe perfectionis, scilicet Deo sine medio, quo, id est, in quantum princeps perfectionis extenditur in eam, scilicet hierarcliiam, porrigens ei, immediate implens eam sanctissima purgatione et multo lumine, sub quo vident quantum ad illuminationem, et consummatione, id est, perfectione quantum ad objectum scientiae ante perfecta : quia a primo ipsi perficiuntur, et postea perficiunt alios, et hoc proportionaliter. cognitionem illuminat, qua etiam purgat mentem illam, quae antea non viderat ea, quae modo illi per sublimiorem illustrationem elucidantur, rursumque perficit eodem ipso lumine, per stabilem scientiam clarissimarum eruditionum.

Sic dico prima hierarchia purgatur, etc. : quidem, id est, certe pura, id est, depurata ab omni minoratione, id est, defectu luminis, ita quod nulla hierarchia minus habet. Et in hoc manifestat purgationem eorum. Vero, id est, sed plena, id est, repleta primi luminis : itaque immediate in ipso fonte accipit. Et in hoc manifestat illuminationem. Et perficitur participans, id est, participando cognitione primo data : quia immediate a Deo, et postmodum datur per eam aliis : et hoc quantum ad medium cognoscendi : et participans perfecta scientia, id est, perficiente per acceptionem scitorum in quibus superfloret natura delectatione : et in hoc manifestat perfectionem.

Autem, id est, sed ego comprehendens haec tria in unum, et, id est, etiam dixerim hoc non immerito, id est, sine ratione fortassis propter defectum humanae rationis in talibus : quia et, id est, etiam purgatio est assumptio divinae scientiae in se quae est a Deo et in Deum reducens, et similiter illuminatio et perfectio, est divinae scientiae assumptio. Utpote, id est, sicut purgans formaliter ignorantiam, id est, nescientiam scientia indita, id est, per scientiam a Deo intus datam, et hoc secundum ordinem perfectiorum doctrinarum, id est, illuminationum respectu inferiorum.

Autem, id est, sed illuminatio est hujusmodi illuminans ipsa divina cognitione, id est, per ipsam per quam et purgatio purgat. Illuminationem dico non contemplantem prius divina quam illumina-

tio manifestat per illuminationem divinam altiorem virtute naturae, quae non est potens inspicere divinam claritatem antequam altiori lumine confortetur : et perfectio est assumptio divinae scientiae, perficiens iterum, non solum purgans et illuminans, ipso lumine, id est, per ipsum sub quo videtur in scientia doctrinarum lucidissimarum, id est, acceptarum in ipso fulgore divini luminis. Scientia dico secundum habitum, id est, difficile mobilem, et producentem actum ad nutum.