EXPOSITIO TEXTUS.

B. Sed et ipsam irrationabilitatem, etc.

Hic ponit tertium exemplum de irrationabilitate et insensualitate. Et primo ostendit qualiter est in aliis. Secundo, qualiter in Angelis, ibi, In immaterialibus autem.

Littera sic legatur: Dictum est furorem et concupiscentiam diversimode esse in Angelis et animalibus : Sed et nos proprie vocamus insensualitatem et insatiabilitatem quidem, id est, certe in irrationabilibus quantum ad irrationabilia, et in materiis inanimatis, quantum ad insensibilia, defectum rationis, quoad unum, et sensus, quoad alterum.

Autem, id est, sed nos dicendo praedicta, in essentiis immaterialibus et intellectualibus , idest, Angelis, confitemur sancte, non erronee, et decenter eis supereminentias earum, id est, essentiarum super rationem et sensum ut supermundanum, id est, tamquam super mundum nostrum existentium. Nos dico excellentes nostram rationem transitoriam, idest, quae transit de vi rationali non prolato sermone, vel de principiis in conclusionem per inquisitionem, et corporalem, supple, spiritum ad se trahentem, ut in aliud per sermonem transeat, ei materialem, idest, materialibus organis utentem ad formandum se in alium, et sensura alienatum, id est, transfusum in alium, in corporalibus animis, id est, existentem propter corporalia organa, ut dictum est: vel sensum quantum ad insensualia, materialem, quia non separatur a materia ut ratio : alienatum, id est, distributum in animis corporalibus, id est, spiritibus corporeis per quos defertur sensus et motus a corde, Vel animi corporales sunt animae sensibiles quae sunt actus corporis, in quibus sunt distributi sensus. Dicuntur ergo materialia irrationabilia et insensibilia, ut deficientes a sensu et ratione, immaterialia autem excedentes utrumque.