DUBIUM ,

Sed circa hoc est dubitatio de ordine.

1. Auditus enim altior est odoratu, ut dicitur in libro de Sensu et sensato : ergo prius debuit ponere auditum, quam odoratum. Si dicatur, quod odoratus est magis necessarius ad esse animalis, quia species odorum sequuntur speciem saporum : tunc videretur, quod tactum prius ponere debuerit, quem ultimo ponit

2. Praeterea, Auditus et visus disciplinae sensus sunt, quorum unus deservit inventioni propriae, et alius doctrinae : ergo eos immediate ordinare debuit.

3. Praeterea, " Visus et auditus, ut " dicit Philosophus, omnium corporum " sunt cognoscitivi, alter per se, scilicet " visus, alter per accidens, in quantum " res significabilis est voce : " olfactus autem nullo modo se habet ad omnia : ergo immediate post visum debuit ponere auditum, et non olfactum.

Solutio, Dicimus, quod Dionysius aliter ordinat sensus spirituales quam a Philosophis ordinentur sensus corporales : quia enim auditus spiritualis est perceptivus veri sub signo, olfactus vero spiritualis est perceptivus boni per suavem emanationem significantem ipsum, bonum autem altius collocat spiritualiter quam verum, ideo prius ordinavit olfactum quam auditum. Tactus et gustus propter hoc quod omnino materiales sunt, ultimo ordinantur, et visus primo propter sui subtilitatem. Rationes autem procedunt de auditu et olfactu corporalibus.