EXPOSITIO TEXTUS.

Redeamus ad Litteram. Perfectissima dispositio tradidit, dico, arbitrans visibiles formas, id est, figuras positas in templis, imagines, id est, repraesentationes invisibilis pulchritudinis: et arbitrans sensibiles suavitates per odorem in thurificatione, figuras, id est, similitudines, invisibilis distributionis, id est, suavitatis in distributione invisibilium donorum. Et arbitrans materialia lumina imaginem, id est, similitudinem, immaterialis luculentiae, id est, illuminationis : et arbitrans sacras decursas disciplinas, id est, lectiones quae leguntur, quibus sacras discimus similitudines, contemplativae plenitudinis secundum intellectum, id est, contemplativae sapientiae, qua intellectus Angelorum repletur a Deo. Et dicuntur

omnes disciplinae decursae sive discursae generaliter, propter discursum principiorum in conclusiones. Specialiter autem Theologia, quia discurrit per multa exempla imperfecte divina repraesentantia, et quia discurrit ab exterioribus dispositionibus comparando eas interioribus, sicut dicitur fuisse frigus ad repraesentandum frigus in corde Petri. Et arbitrans ordines earum dispositionum quae sunt hic, id est, in Ecclesia, quia alii superabas disponuntur, similitudines, habitus, id est, habitudines spiritualium, ordinati et adunati ad divina, id est, quo ordinantur ad invicem, et uniuntur in ordinatione ad Deum. Et arbitrans assumptionem divinissimae Eucharistiae, similitudinem participationis Jesu, qua participatur in patria, et quaecumque alia sunt tradita caelestibus essentiis supermundane, id est, modo qui supra nos est, vero, id est, sed, nobis sunt tradita symbolice, id est, corporalibus figuris.

Ergo misericors, Deus, principium omnis perfectionis propter hanc theosim, id est, propositionem nostram, corrationalem, id est, propter hanc dispositionem manifestandi spiritualia corrationabiliter nobis. Misericors, dico, descripsit in sacroscriptis eloquiorum compositionibus, id est, compositionibus corporalibus scri-

ptis in sacra Scriptura, caelestes intellectus, id est, Angelos. Descripsit, dico, ad virtutem nostram, id est, proportionaliter nobis, similitudinem sanctificationis eorum deiformis, scilicet sensibilibus imaginibus, id est, descripsit Angelos figuris sensibilibus, quae sunt similitudo Angelorum deiformium, hoc est, Deo similium sanctificatorum a Deo. Descripsit, dico, et manifestans nobis caelestes, id est, angelicas, hierarchias, et perficiens, hac manifestatione, nostram hierarchiam, id est, ecclesiasticam, comministram earum, scilicet caelestium hierarchiarum. Et dicitur comministra, non quod occupetur circa eadem ministeria numero, sed propter ordinem ad eumdem finem, cui tamen quia illa propinquius inhaeret, ideo nostra dicitur comministrare sibi. Descripsit, dico, quatenus reduceret nos in intellectualia per sensibilia et ex symbolis id est, similitudinibus, sacris figuratis, id est, sacrorum figuris expressis, insimpias, id est, simplices summitates caelestium hierarchiarum. Summitas est id quod excellit in re : unde summitates hic dicit superiores Angelos in quolibet ordine, et superiorem ordinem in una hierarchia, et superiorem hierarchiam inter omnes. Et ad ultimum ipsum principium omnium hierarchiarum.