BALTH. CORDERII, S. J. INTERPRETATIO,

Quod si quaerat aliquis, quare populus Hebraeorum solus ad divinas illustrationes sit evectus, respondendum utique, rectis angelorum gubernationibus nequaquam imputandum esse, caeterarum gentium ad falsos deos defectionem, sed eas ipsas motibus propriis a recta, quae ad Deum ducebat, via deflexisse, per amorem proprium, suamque pervicaciam, et rerum, quibus divini quidpiam inesse arbitrabantur, absurdum cultum. Hoc ipsum Hebraeorum populo usu venisse confirmatur : Agnitionem enim, inquit, Dei repulisti, et post cor tuum ambulasti. Neque enim vita nobis est, cui vis illata, aut imposita necessitas, nec eorum quae providentur libertate, divini radii illustrationis, quae a providentia manat, obtunduntur : sed oculorum mentis dissimilitudo facit, ut exundans paternae bonitatis illustratio vel omnino cassa sit, et propter eorum repugnantiam inutilis ; vel ejus parti- dones facit differentes, parvas aut magnas, obscuras aut claras, unius aut simplicis, et semper eodem modo se habentis et superexpansi fontalis radii.