DUBIUM

HIC est dubitatio, Utrum Angeli primo sint edocti de mysterio Incarnationis ? Et videtur, quod non, sed acceperunt ab hominibus.

1. Dicit enim Apostolus ad Ephes. III, 8 : Mihi enim omnium sanctorum minimo . Et infra, iii, 10 : Ut innotescat principibus et potestatibus in caelestibus per Ecclesiam. Et loquitur de sacramento Incarnationis. Non ergo Angeli primo de hoc sunt edocti.

2. Praeterea, Glossa Hieronymi super hoc dicit : " Videte quantum est hoc, " quia per hoc aliquid accrevit Angelis, " qui multa secreta in his didicerunt. " Et sic idem quod prius.

3. Praeterea, In Psalmo xxiii, 10, dicitur: Quis est iste Rex gloriae? Et est vox Angelorum quaerentium de descensu ad inferos, ut dicit Hieronymus. Item, Isaiae, lxiii,1, quaerunt de ascensu ejus, dicentes : Quis est iste qui venit de Edom, etc. Ergo videtur, quod non prius de his fuerunt edocti.

4. Praeterea, Major potest illuminare minorem : sed quidam sancti fuerunt majores quibusdam Angelis, ut dicitur I ad Corinth. VI, 3 : Nescitis quoniam Angelos judicabimus. Et dicit ibi quaedam Glossa, " comparatione. " Ergo videtur,

quod aliqui sancti potuerunt illuminare

Angelos.

Ad oppositum, i. Est quod dicit Augustinus, super eodem loco, his verbis : " Non " latuit eos mysterium regni caelorum, " quod opportuno tempore revelatum " est. " Et videtur ibi dicere, quod Filio Dei innotuit ante saecula, Angelis a saeculis, Ecclesiae in saeculo. Ergo ipsi primo sunt edocti.

2. Praeterea, Intellectus deiformis est lux respectu intellectus inquirentis per imaginem et vestigium : omnes autem Angeli habent intellectum deiformem, quilibet autem homo in hac vita (excepto Christo, qui fuit viator et comprehensor) habet intellectum inquisitivum per vestigium et imaginem : ergo inferior Angelus potest illuminare hominem quantumcumque magnum.

Solutio. Dicimus, quod Angeli a saeculis sunt edocti de mysterio Incarnationis quantum ad substantiam facti, et non quantum ad modum secundum omnes particulares conditiones, et has per accidens sciverunt ab Ecclesia, non tamquam ab ea illuminati, sed Apostolis praedicantibus acceperunt cognitionem eorum sicut cognitionem omnium sensibilium. Et sic etiam differt Propheta ab Evangelista : quia Propheta scit substantiam facti, sicut Passionem et Incarnationem, sed nescit totum modum quo completur : Evangelista utrumque. Unde duo ultima concedo, et per hoc patet solutio ad auctoritatem Apostoli, et Glossam Hieronymi : non enim dicunt, quod ab hominibus sint illuminati, sicut dictum est.

Ad alia duo dicendum, quod non faciebant Angeli illas quaestiones hominibus : sed sicut dicit Dionysius, quaerebant ab invicem, ut edocerentur a Christo de modo facti, more discipulorum qui a Magistro ob reverentiam non quaerunt, sed co-

ram ipso ab invicem. Unde etiam Dominus in persona sua respondit : Ego qui loquor justitiam, etc. .

Ad ultimum dicendum, quod nullus sanctorum fuit in hac vita major Angelo quantum ad statum, sed forte quantum ad causam, quia tantam gratiam quae meretur majorem locum quam Angelus aliquis habeat.