EXPOSITIO TEXTUS.

A. Itaque per alium, etc.

Hic manifestat quod dixerat per similitudinem locutionis, dicens : Itaque, ex quo media perficitur mediante prima, nos adaptantes huic aliquam similitudinem, faciemus, id est, dicemus symbolum, id est, " paradigma " secundum Commentatorem, id est, exemplarem formam, dictum per unum quantum ad irradiationem luminis recepti a Deo in alterum, auditum ab alio quod suscipit illam irradiationem, venire a longe, scilicet ab ipsa divina altitudine, in alium Angelum, qui est de media hierarchia, per alium, id est, mediante alio qui est de prima, ad similitudinem clamantis de longinquo. Symbolum dico perfectionis divinae superperfectaes, quia est super omnem perfectionem, et occultae per processionem ejus in sequentia mediantibus primis : non quia deficiat ejus claritas tamquam propter suam fatigationem, sed quia ab inferioribus in minore fulgore recipitur. Dicitur enim symbolum ejus in quantum est ipsa exemplata in primis, et deinde per eos in mediis.

Nam sapientes. Hic ostendit quod dictum est, concordare dictis sapientium in divinis, a quibus accepit, dicens : Hoc ita est sicut diximus. Nam, id est, quid sa-

pientes circa nostras sacras immolationes, id est, sacros ordines Ecclesiasticos quibus immolamur et consecramur Deo. Alia translatio, acres, id est, subtiles circa talia. Aiunt, id est, dicunt plenitudines divinorum, id est, Angelos ad copiam repletos divinis donis,lucentes divinolumine per seipsas, non quin a Deo habeant, sed quia non mediantibus aliis substantiis. Has dico esse perfectiores participationum contemplativarum , id est, participationibus contemplativis, more Graeco, id est, Angelis participantibus divinam contemplationem, per alias, id est, superiores substantias. Sic, id est, conformiter eis ego aestimo, et, id est, etiam immediatam participationem angelicorum ordinum primo extentorum, et convertentium se in Deum, scilicet primae hierarchiae esse perfectiorem participatione perfectorum per medietatem, id est, mediantibus aliis, id est, illis de media. Propter quod, scilicet quia minus' perfecti sunt qui sunt perfecti per medium, et, id est, etiam a traditione nostra sacerdotali, id est, doctrina nobis per sacerdotes tradita, ut Ezechielem, et Zachariam, et alios qui visiones habuerunt, primi intellectus, id est, Angeli primae hierarchiae cum sint caeteris perfectiores, nominantur virtutes perfectivae et lucificae, quantum ad illuminationem, et purgativae inferiorum ordinum. Primi dico intellectus tamquam de numero reductorum, per se non mediantibus aliis, in superessentiale principium omnium, scilicet Deum, et tamquam de numero factorum in participatione mysticorum, et divinarum quae occultantur ab inferioribus, purgationum et illuminationum et perfectionum, secundum quod eis fas est, id est, possibile.