Albert the Great, De Animalibus

In hoc ultimo de animalibus parvis ahaemis . hoc est, sanguinem non habentibus, agemus primo hic in communi, ex dudum dictis repetentes : quia sanguinem non habentia loco sanguinis alium habent humorem, qui est eis sanguinis loco.

Et quia talia frigida sunt ut in pluribus, ideo duo accidentia consequuntur illa animalia, quorum unum est corpora eorum ubique esse insecta, et quasi ex annulis generationem habentibus composita. Sanguinem enim habentia nutriuntur longis quibusdam carnibus per modum linearum in membris extensis.

Ea vero quae sanguinem non habent, ex centro corporis secundum totam longitudinem tracto humore ad superficiem quasi ex quibusdam circulis accipiunt sui corporis compositionem, ac si sint composita ex superficiebus circularibus duris : et hoc etiam habent convenientiae cum serpentium compositione.

Aliud autem est, quod spiritus resoluti ex hujusmodi temperato humido subtiles sunt et clari, calido multo non commiscente et turbante eos : propter quod etiam omnia talia subtilium sunt operationum, et ut frequenter sunt mansuete cohabitantia et civiliter : et haec acciden- tia frequenter inveniuntur in eis. In exterioribus autem corporum suorum propter multum calorem circumstantis aeris et propter terrestre ad exterius expulsum, innascitur in illis duritia corticis in exterioribus annulis, ita quod aliquando pellem talia oportet mutare, sicut expresse apparet in multis eorum quorum depositae inveniuntur exuviae. Ex humoris autem intrincesi viscositate et terrestreitate contingit, quod ista animalia aut latent in hieme, ut apis, et vespa, aut moriuntur ad ovalem conversa materiam. Humidum enim ipsorum in hieme congelaretur, si accideret eis humor nutrimenti continuus propter caloris debilitatem : aut ita multiplicaretur tempore generationis phlegmatis, quod suffocaretur calor naturalis : aut forte contingeret utrumque istorum : et ideo motus horum animalium in hieme non proficit.

Haec etiam animalia cum subtilis sint humiditatis, grossi nutriri non possunt : propter quod exceptis valde paucis omnia sugunt, vel rores ut apes, vel humores animalium ut muscae : pauca autem rodunt herbas dum recentes sunt, ut eruca et locusta : propter quod etiam paucissimae sunt superfluitates egestae ab eis: et quia humiditas haec est viscosa et conjacens ad modum catenae, ideo diu haec vivunt sine cibo. Debilis enim calor eorum naturalis diu operans est, antequam humidum dissolvat et terminet : et ideo in tali humido est hujusmodi animalibus quasi vitae thesaurus, ex quo multo tempore vitam sustentant: et quod ex hujusmodi humido ad substantiae nutrimentum non congruit, quaedam eorum convertunt ad usum coopertorii domus : et quaedam ex his faciunt instrumenta venandi, sicut bombices sericum faciunt quo se involvunt, et araneae telas quibus venantur.

Amplius omnia fere hujusmodi animalia aut sine pedibus sunt, aut multos habent pedes, aut etiam alas cum pedibus, aut sine pedibus sunt quaecumque calore maxime deficiunt, qui remotus a princi-

pio caloris, nihil penitus operari potest : et illa componuntur ex annulis, quorum vis in centro suo calorem claudit moventem, qui per modum axis per omnes annulos dirigitur totius corporis hujus animalis, sicut et vis motus in toto axi est a polo in polum per centrum destinatus : et in hac linea axis decurrit virtus membri, quod est loco cordis cum spiritu et calore cordis : quoniam facilius duabus de causis decurrit per azem, quam per aliam partem. Harum autem causarum una est, quia est ex directo : quia ab angulo difficilior est motus spiritus et caloris. Alia autem est, quia undique circumposita est via illa custodientibus et nutrientibus eam membris articularibus, quae sunt multae sphaerae compressae. Nutritur etiam spiritus ex humido, et custoditur ab annulis : quod non esset, si derivaretur ad membrum naturae alicujus, et postea derivaretur in crura et lacertos et hujusmodi. Haec ergo animalia de causa talem sui corporis habent dispositionem.

Quaedam autem eorum multa habent crura ad pectus inferius radicata, eo quod latus calor non operatur per vicarium moventem, sed per seipsum. Per vicarium autem dico operari, sicut cor per cerebrum, et cerebrumper nucham. In his ergo lento existente calore oportet instrumenta motus ad membrum quod loco cordis est ordinare. Hujus autem signum est, omnia hujusmodi animalia parvo timore frigescere et immobilia fieri propter sui cordis frigiditatem. Multitudo autem pedum causatur ex debilitate quae est in quibuslibet duobus : quia etiam ipsi pedes propter sui subtilitatem et duritiam parvae sunt virtutis. Quod autem alas habent et ad dorsum continuatas, ideo est, quia longe sparsus est eorum cibus : nec habent alas nisi memhranales propter humidi viscositatem ex quo formantur. Haec est etiam causa, quod plura etiam horum animalium plures habent generationes antequam perficiantur. Fiunt enim ex ovis vermes, et ex ver- mibus perfecta animalia, ut in apibus. Quaedam etiam ex vermibus adhuc iterato in materiam convertuntur ovalem, sicut in erucis fieri videmus, sicut nos in antecedentibus hujus scientiae libris diligenter per singula ostendimus .