CAPUT I.

De membris exterioribus annulosorum.

Postquam autem de interioribus om- nium diversitatum animalium jam determinatum est, reducendus est sermo ad extrinseca membra earumdem diversitatum animalium : et ut non cogamur repetere dicta, dicamus prius extrinseca membra annulosorum, quorum ultimo in praecedenti libro diximus membra interiora.

Haec autem sunt animalia paucorum sensuum, et debiliora caeteris animalibus perfectis sanguinem habentibus, propter quod consequens est talium animalium non esse multa membra exteriora, licet quaedam eorum multum ab aliis diversificentur. Quaedam enim annulosorum multos habent pedes propter sui tarditatem naturalem : quae tarditas ex naturali causatur frigore, ut ex multis pedibus

motus eorum sit levior : hoc enim est sola causa quare animal frigidum ut in pluribus est multipes, et propter sui corporis longitudinem, sicut genus animalis quod dicitnr bolom, quod annulosum effectum est propter multitudinem suae carnis : et hac de causa multos habuit pedes. Quod vero de genere talium animalium est paucae carnis et paucioris corporis, consequenter etiam pedes habet secundum hoc pauciores, et maxime avis quae vocatur solitaria, et haec est musca quaedam solitaria volans, et est valde magna. Aves autem annulosae quae volant in comitatu, et habitant simul civiliter, quatuor habent alas, et sunt levis corporis, sicut apes, et sibi similia: et habent duos pedes in dextra, et duos in sinistra, nec habent magis quam ut sex pedes, ne multitudo et onus pedum prohibeat suum victum. Igitur quod ex istis animalibus est parvum, habet duas alas tantum, sicut genus muscarum: quod vero est quidem parvum, sed regimen vitae ejus est fixum et determinatum, habet multas alas, sicut sunt alae apis, eo quod suae alae sunt membranales, sicut sunt genera vesparum et sibi similia : et hoc est propter salutem alarum. Quia vero hoc animal est fixum et manens, pauci motus existens, citius accidit ei occasio infirmitatis quam in aliis animalibus quae sunt boni motus: et ala istius animalis est fissa in duo, nec habet membrum illud quod cannae assimilatur, neque alae ejus sunt plumatae, sed membranales: et necessario separatur tela illa a corpore, quando pars corporis carnosa quae est in eis infrigidatur. Hoc autem animal non est annulosi corporis, nisi propter causas superius dictas : per annulositatem enim efficitur curvum postquam fuit longum: et hoc esset impossibile, si non esset annulositas corporis. Quod autem ex hujusmodi animalibus est non involutum, efficitur valde durum quando corpus ejus in se constringitur, et in seipso adunatur: et hoc manisfestum est in vespa johalh : haec enim quando timet, immobilis fit, et valde dura: hoc enim animal necessario factum est annulosi corporis : quoniam ex natura ejus est ut habeat multas indurationes : et in hoc etiam secundum aliquid assimilatur arboribus. Istud etiam animal vivit abscissum, modico tamen tempore : sed arbores abscissae convalescunt perfecte : propter quod ex una arbore multae oriuntur quamvis abscissa sit.

Amplius autem quaedam annulosorum habent aculeum quem natura dat ad arma et vigorem et utilitatem defensionis, et quaedam ipsorum habent aculeum juxta locum linguae, et quaedam in cauda. Et sicut elephante proboscis congruit in duo opera, ad arma videlicet, et ad usum cibi : ita in duplici usu haec annulosa habent linguam aculeatam : sunt enim armata per eam, et per ipsam sugunt cibum ab interiori coriorum animalium quae perforant per ipsam, et sentiunt per ipsam. Ea autem quae de numero annulosorum non habent hujusmodi aculeatam linguam, habent dentes quosdam qui moventur unus a dextra, et alter a sinistra, per quos accipiunt et sentiunt cibum, sicut formicae, et acati, et opinati, et apes, et vespae. Alia autem habent aculeum in posteriori caudae suae, et quaedam istorum habent eum intra corpus, et quaedam extra prominentem. Intra quidem sicut apum genera, et vespae citrinae magnae. Extra autem prominentem habent genera scorpionum. Nam si aculeus apum et vesparum esset extra corpus, corrumperetur de facili, quia est debilis et gracilis, et esset causa ponderositatis. Scorpionum vero genera qui habent aculeum post, habent eum extra propter fortitudinem, et quia non volant, et ideo non gravantur pondere ipsius : et haec animalia omnia quae retro in cauda habent aculeum ad arma tantum : nec est aliquod animal habens duas alas tantum, et habens aculeum post propter sui debilitatem et carentiam sanguinis. Modus autem animalis parvi aculeati anterius est multus valde numero et specie, sicut

cynifes, et culices, et pulices, et hujusmodi : et quidquid istius modi aculei habet, defert animal minus quod potest esse aculeatum : et ideo etiam defert eum in anteriori corporis, ubi est vigorosius : nec tamen etiam ante pungit cum aculeo, nisi cum difficultate et labore propter sui debilitatem.

Modus vero animalium annulosorum habentium multas alas, multitudinem habet alarum propter magnitudinem corporis et vigorem : et hoc animal habet vigorem in membris posterioribus, et ideo habet aculeum post. Melius enim est ut sit unum membrum conveniens uni operationi, et aliud alii, nisi necessitas compellat ad hoc quod unum habeat duas operationes : et ideo aculeus talis acutus non est nisi loco armorum. Aculeus autem qui est ut lingua, est ad trahendum cibum. Natura quippe ubi convenienter potest, utitur duobus membris ad duas operationes, ubi unum non prohibet aliud : nihil enim facit otiose. Aliquando autem uno membro utitur in duabus operationibus. Sicut etiam faber facit unum instrumentum aliquando ad duas operationes, sicut facit lucernam quia est et vas reservatorium et continens candelam : sic etiam quando natura convenienter potest uti eodem membro ad duas operationes : tunc facit unum membrum, et dimittit aliud.

Amplius autem pedes horum modorum animalium sunt majores, eo quod ipsa habent duros oculos, et non bene vident, et ideo fortem comprehensionem ad tenendum quod accipiunt oportuit ea habere in pedibus anterioribus : non enim capiunt quod desiderant, nisi per virtutem pedum anteriorum. Ad visum autem patet haec animalia facere quod dictum est, sicut videtur in generibus muscarum, et modis omnium animalium quae apibus assimilantur. Pedes autem posteriores sunt majores mediis : hi enim sunt ad duo, scilicet ad ambulationem in qua portant maxime corpus pedes posteriores : et sunt etiam ad impingendum quando a lena elevantur ad saltum vel volatum : et ad hoc exigitur fortitudo. Hoc autem manifestius est in his quae saltant animalibus, sicut locusta, et pulex : haec enim posteriores pedes primo flectunt, et postea subito extendunt, et sic impingunt totum corpus ad saltum a terra accipiendum. In tali autem saltu oportet flecti pedes ad anterius corporis, et genu cruris curvari ad exterius : et talis inflexio in anterioribus pedibus nullatenus esse potest. Omnes enim isti modi sex pedes habent cum duobus longis posterioribus per quos accipiunt saltum.

Haec igitur est dispositio membrorum exteriorum corporum annulosorum.