54. De sancto Basilio.

1. Salve, qui magnus diceris,
Basili, Deo carus,
Doctrinis, signis legeris,
Virtutibus praeclarus.
2. Columna Ignis paruit
Effrem praefiguralis,
Vox de coelo Intonuit:
Basilius est talis.
3. Ornatu, clero, populo
Stipatum te despexit,
In oris tui patulo

Donec Ignem conspexit.

4. Tunc laudes tuas protulit
Deusque tua prece
Eidem donum contulit,
Quod loquebatur graece.
5. Quidam cupiscens virginem
Ardore voluptatis.
Expleret ut libidinem
Perversae voluntatis,
6. Se hosti totum subdidit,
Damnandum obligavit.
Chirographumque tradidit
Et Christum abnegavit.

7. Hunc meritis et precibus
Reducis creatori,
Instructum bonis moribus
Restituis uxori.
8. Cum Ariani quaererent,
Fideles ut privarent
Ecclesia, et clauderent
Hanc ambo et signarent,

9. Haec tridui oraculo

Horum non reseratur,
Cum pastorali baculo

Hanc tangis, mox Intratur.
10. Cum Caesar te exsilio
Perimere delegit,
Ter fracto cartae graphio
Iratus cartam fregit.

11. Cum medicus assisteret
Judaeus hora mortis,
Tibi tuisque diceret,
Jam esse te In portis,

12. Sed te ad nonam vivere
Alterius diei
Videns, fatetur libere
Virtutem Christi Dei.
13. Resumpto ergo robore
Mox Illum baptizabas,
Et resoluto corpore
Ad gaudia migrabas.
14. Qui mulieris facinus
Defunctus delevisti
Signatum carta, protinus
Ut tactus hac fuisti,
15. Ut munder a flagitiis
Nec faciant me reum,
Ne laber linguae vitiis,
Te quaeso, roga Deum.
16. Da fluxum mundi spernere
Nec delectari laude,
Da luxum carnis stringere
Nec captum hostis fraude.

17. Transacto vitae stadio
Rejecta carne vili,
Coelesti fruar bravio,
Fac, pontifex Basili.