41. De sancto Mauritio et sociis ejus.

1. Salve, sancta beatorum
Thebaeorum legio,
Cui nomen inclytorum
Dat Thebaea regio.

2. Quando Diocletianus

Vos a terrae finibus

Advocat, licet profanus,

Sumptis exercitibus

3. Pergitis obtemperantes
Ut subjecti Caesari,
Et sub Illo militantes,
Quamvis cultu dispari.

4. Sed ut armis fidem Dei
Conabatur persequi,
Vos virtute firmae spei
Recusastis exsequi.

5. Tunc secundo decimavit
Vos tyrannus gladio,
Tandem cunctos trucidavit
Consecrans martyrio.

6. In Agauno estis morti

Propter Christum traditi,
Beatorum vero sorti

Nunc per Christum dediti.

7. Ibi Maurus ut sol claret
Inclytus Mauritius,
Superatus non apparet
Ibi Exsuperius.

8. Ibi nimio decore

Fulget niger Candidus,
Ibi viret In vigore
Victus Victor floridus.

9. Ibi vitam nunc Vitali
Dat vitalis gratia,
Innocentium VI tali
Beat Innocentia.

10. O vos sexies milleni,
Qui perfecto numero
Sexcenteni sexageni
Sex In statu prospero

11. Jam regnatis cum beatis
Summis In deliciis,
Me sex alis protegatis
Ut seraph a vitiis.

12. Sex diebus hujus vitae
Per vos me In optimo
Sic exercitem, ut rite
Requiescam septimo.

13. Largitatis corporalis
Piis sex operibus,
Pietatis spiritalis
Totidem In actibus

14. Sic exhibeam me gratis,
Ne sex Improperia
Audiam cum reprobatis
Judicis sententia,

15. Sed propinquent coeli throno
Sex virtutum gradibus,
Ad fruendum summo bono
Tunc cum vobis omnibus.