1. Amictus B. M. V.

1. Ave sole purior,
Luna plena pulchrior,

Splendida Maria ;
Mundi luce clarior,
Cunctis astris gratior.

Digna laude pia.
2. In te, solem gratiae,
Christus, sol justitiae,

Mire radiavit,
Cujus lux laetitiae
Mortis et moestitiae

Tenebras fugavit.
3. Tu sol super omnia
Lucens, noctis inscia,

Sole es amicta,
Uerae lucis gaudia
Fiant nobis pervia

Per te, benedicta.
4. Solis per officia
Confer beneficia,

Lustra latebrosa,
Carens immunditia,
Nostra purga vitia,

Firma ruinosa.
5. Liquefac et arida,
Mollia consolida,

Corda molli dura,
Ac exsicca fluida,
Calefac et frigida,

Salva peritura.
6. Reduc, rege devia,
Robora debilia,

Fove nascitura,
Incita viridia,
Trahe vaporantia,

Proba permansura.

7. Sicut sol spectabilis,
Visu delectabilis,

Tibi dat amictum,
Sic luna mutabilis
Mundus et Instabilis,

Quem calcas devictum.
8. In quo sine macula,
Munda Dei famula,

Mundum respuisti,
Mundi spernens singula,
Mundo corde sedula

Christo adhaesisti.
9. Effice, ut vanitas
Mundique cupiditas

Per nos refutetur,
Voluptatum pronitas
Omnisque Iniquitas

Penitus Vitetur.

10. In te, Virgo regia,
Stella maris praevia,

Stellea corona
Refert singularia
Bis sex privilegia,

Gratiarum dona.
11. Grata Inchoatio
Est sanctificatio

In ventre materno,
Insons conversatio,
Gratiae repletio

Pneumate superno.
12. Non Virili semine
Sed sacro spiramine

Superveniente,
In te obumbramine
Patris atque numine

Concipis agente.

13. Sic concepto filio
Gravida cum gaudio

Parturis, jucunda
Mater nato proprio
Cum pudoris lilio

Et virgo fecunda.

14. Absque pari femina,
Angelorum agmina

Praemio praecellis,
Regnans coeli domina,
Gyras mundi lumina

Duodenis stellis.

15. In coeli cacumine
Tu sol solis lumine

Digne trabearis,
Et bisseno ordine
Beatorum culmine

Pulchre coronaris.
16. Ambiunt hierarchici
Ordines angelici

Novem te mirantes,
Martyres hymnidici,
Confessores coelici.

Virgines laudantes.

17. Eja, splendor patriae.
Sis lucerna veniae

Luridis In via,
Nos per lumen gratiae
Duc ad lumen gloriae,

Fulgida Maria.