7. Gaudia beatae virginis Mariae.

1. Gaude, virgo, dico gaudens,
De favore tuo audens,
Laeto corde tua plaudens
Replico nunc gaudia.

2. Gaude, virgo, mater Christi,
Verbum verbo concepisti,
Dum ab angelo audisti:
Ave plena gratia.

3. Gaude, sine partu tristi
Virgo partum edidisti,
Immo gaudens protulisti
Prolem mater filia.

4. Gaude, magi procidentes,
Tuum natum agnoscentes,
Deum regem profitentes
Tria ferunt munia.

5. Gaude, natum, quem Iactasti,
Hunc in templum praesentasti,
Et te, virgo, expiasti
Patientum hostia.

6. Gaude, quia tuus natus
In mortem pro nobis datus,
Te vidente tumulatus,
Surgit cum victoria.

7. Gaude, limbum destruentem,
Inde justos eruentem
Christum vides transcedentem
Coelos ex vi propria.

8. Gaude, cum in igne misit
Pneuma sacram, ut promisit
Christus suis, tunc immisit
Tibi hoc in copia.

9. Gaude, Christus cum levavit
Te In carne et locavit
Supra astra, obviavit
Tota coeli curia.
10. Gaude, virgo singularis,
Ut prae cunctis sublimaris.
Sic et digne plus laudaris
In coelesti gloria.
11. Gaude,virgo, quae decore
Ornas coelum lucis more,
Velut cuncta sol splendore
Superat lucentia.
12. Gaude, cui angelorum
Chori parent et sanctorum
Ut reginae ac votorum
Exhibent obsequia.
13. Gaude, quod vis esse ratum,
Tuo nato exstat gratum
Et omnem tuum precatum
Explet cum clementia.
14. Gaude, qui te venerantur,
Tua laude delectantur,
Hi per Christum munerantur
In superna patria.

15. Gaude, summe coronata
Carnis dotibus ornata,
Christi dextris sociata
Regnas super omnia.
16. Gaude, semper perfrueris
His deliciis sinceris,
Ut In aevum jucunderis
Summa cum laetitia.
17. A me mundi jam evelle
Gaudia permixta felle,
Immo me tuorum melle
Gaudiorum satia.
18. Veni, virgo, da laetari
Me In te, nunc consolari,
Et In fine gratulari
Tui de praesentia.
19. Dona mihi te videre,
Semper tibi congaudere,
Tecum plene possidere
Beatorum praemia.
20. Ecce tibi congaudemus,
O Maria, ut amemus
Te In aevum et laudemus,
Duc nos ad coelestia.