50. De sancto Nicolao.

1. Salve, mirae sanctitatis
Nicolae pontifex,
Vasculum te pietatis
Summus fecit opifex,

2. In aquali erigebas
Te die primaria,
Semel tantum lac sugebas
Quarta, sexta feria.

3. Puerorum non lasciva
Quaeris puer gaudia,
Verbum Dei rediviva
Retinens memoria.

4. Auri massas erogasti
Patrique virginibus.
Quos a fame liberasti
Canusque criminibus.

5. Nomen prodit et probatum
Vox elapsa coelitus,
Sicque digne praesulatum
Nactus es divinitus.

6. Tempestate conquassatis
Jamque naufragantibus,
Absens opem desperatis
Praebes implorantibus.

7. Populum a famis nece
Eruis famelicum,
Datum et servatum prece
Dum adauges triticum.

8. Humilis, justus, benignus
Es In cunctis actibus,
Omni quoque laude dignus,
Plenus tu virtutibus.

9. Tu quam plures praeservasti
Necis a periculo,
Angelis te Inclinasti
Mortis In articulo.

10. Cum defunctus sepeliris
Tumulo marmoreo,
Multis salus modis miris
Es manante oleo.

11. Sed repulso successore
Sistunt olicidia,
Quo reverso cum liquore
Redeunt remedia.

12. Tres defunctos suscitasti
Jam exstinctus corpore,
Signis miris coruscasti
A primaevo tempore.

13. Nicolae, sancte Dei,

Precor te suppliciter,
Miserere pie mei,
Subveni celeriter

14. Mihi cunctis In adversis
Corporis et animae,
Ne subvertant me perversis
Factis, hostes reprime.

15. Dele culpas cum reatu
Et exposce gratiam,
Tuta me In mortis statu
Tuam per praesentiam.

16. Tunc me, Deus Adonai,
Eripe ab hostibus,
Prece sancti Nicolai
Coeli junge civibus.