37. De sancto Thoma Cantuariensi.

1. Salve, antistes Anglice,
Tu Cantuariensis,
Sancte Thoma, angelicae
Vitae sine offensis.

2. Nam a primaevo tempore
Semper In omni statu
Pudicus mente, corpore
Pollebas coelibatu.

3. Tu tibi singulariter
Elegeras Mariam
Amicam spiritaliter
Et advocatam piam.

4. De cujus excellentia
Dum pie gloriaris,
Es tactus conscientia,
Prostratus lacrymaris,

5. Ejus coram Imagine

Clementiam petendo,
Temeritatis crimine
Te noxium fatendo.

6. Sed ejus mox affamine
Es pie consolatus,
De tua, Inquit, virgine
Es bene gloriatus.

7. In pyxide eburnea

Dans praesulis ornatum
Cum pecia purpurea,
Tuum designat statum.

8. Ebur corpus virgineum,
Ornatus praesulatum,
Te purpura dat rubeum,
Martyrio sacratum.

9. Jam pontifex pauperibus
Quotidie lavabas
Pedes curvatis genibus
Et munus erogabas.

10. Vigiliis, jejuniis

Te maceras Intenso,
Corpus tegis cilicio
Ad poplites protenso.

11. Virgo tibi cilicium
Refecit derelictum,
Presbytero officium
Ut laxes Interdictum.

12. Constanter jus ecclesiae
Defendis contra regem.
Qui jussit te, justissime,
Occidi contra legem.

13. Dum defunctorum clerici
Suffragia solvebant,
Cantum coetus angelici
Tunc martyrum canebant:

14. Laetabitur In Domino

Justus, In quo speravit,
Cui laus sine termino,
Quod sic te coronavit.

15. Nunc quaeso reconcilia
Me virgini Mariae,
Salutis ut remedia
Impendat mihi pie.

16. A culpis me custodiat,
In bonis det juvamen,
In morteque subveniat
Et conferat solamen.

17. Ereptum ab exsilio

Perducat ad superna.
In ejus tecum filio
Pace fruar aeterna.