16. De sanctis Petro et Paulo.

1. O Petre, apostolice

Pastor divini gregis,
O Paule, evangelicae
Doctor supernae legis.

2. In terra Christus advocat
Te a piscatione,
Te coeli luce revocat
A persecutione.

3. Te principem constituit
Ecclesiae justorum,
Te gentibus Instituit
Doctorem credendorum.
4. In monte claram perspicis
Christi humanitatem,
In raptu clare aspicis
Ejus divinitatem.
5. Tu Christum Dei filium
Vivi Jesum confessus,
Tu populis gentilium
Hunc clamans Indefessus.
6. Tu super mare graderis,
Tu naufragus es maris,
Tu fers squalores carceris,
Tu vero lapidaris.
7. Per signa, per miracula
In mundo coruscastis,
Per mortisque pericula
Christum clarificastis.

8. Te crux, te mucro abstulit
Certantes In agone,
Eadem urbs, lux obtulit
Vos Christo sub Nerone.
9. Vos duo luminaria

Magna, pulchra, divina,
Virtutum exemplaria,
Candelabra vos bina.

10. Supernae lucis radiis
Lustrate Intellectum,
Virtutum donis variis
Imbuite affectum.
11. Binae tubae argenteae
Verbo Dei clangentes.
Duae columnae aereae
Fideles fulcientes.
12. Formate Dei legibus
Et morum disciplina.
Stipate me virtutibus
Et gratia divina.

13. Sanctus, sanctus vos Seraphim
Alterutrum clamentes,
Duo In templo Cherubim
Vos alas dilantantes.
14. Ad diligendum fervide
Incendium praebete,
Me ad noscendum limpide
Scientia replete.
15. Duae olivae gratiae
Vos filii splendoris,
Ostiola vos patriae
Bina miri decoris.
16. Per vos culparum veniam
Et gratiam nanciscar,
Per vos coelestem gloriam
Cum sanctis adipiscar.