51. De sancto Benedicto.

1. Salve, sancte Benedicte,
Gratia et nomine,
Prodis, vernans flos depicte,
De virtutum germine.

2. Puer eremum petisti,

Linquens Romae studium,
Prece sancta compegisti
Fractum capisterium.

3. Per trimatum habitabas
In specu penuriae,
Spinis vepribus fugabas
Merulam luxuriae.

4. A subjectis praeparatum
Venenatum poculum
Rumpis tibi praesentatum
Crucis per signaculum.

5. Duodena construxisti
Deo monasteria,
Tribus prece produxisti
Laticem In copia.

6. Ferrum cadens In profundas
Aquas per te remeat,
Maurus currit super undas,
Placidus ne pereat.

7. Multum populum avertis
A cultu Apollinis,
Lucum, Idolum subvertis,
Aram tanti criminis.

8. Missum tibi toxicosum
Panem corvus projicit,
Florentinum malignosum
Domus ruens dejicit.

9. Saxum grande leviasti
Quod Satan gravaverat,
Et sophisticum monstrasti,
Ignem, quem succenderat.

10. Monachellum suscitabas,
Paries quem triverat,
Rusticellum revocabas,
Qui defunctus fuerat.

11. Tu farinam adauxisti
Prece ac pecuniam
Oleumque coauxisti
Ad superfluentiam.

12. Alapam dans expellebas
Hostem a daemonico.
Solo visu resolvebas
Loramenta rustico.

13. Miros actus perfecisti
Ex virtutum habitu,
Mira multa cognovisti
Prophetiae spiritu.

14. Praedixisti diem mortis.
Fodi jubes tumulum,
Paradisi nunc In hortis
Jubilas In saeculum.

15. Nam lampadibus resplendens
Via, strata palliis,
A cella In coelum tendens,
Te dat coeli gaudiis.

16. Tu divinis benedictus
Benedictionibus,
Tu maligni nunquam victus
Es suggestionibus.

17. Tibi supplico constrictus
Peccatorum funibus,
Me absolve, ne addictus
Morti, tradar Ignibus.

18. Benedictus a re dictus,
Quaeso, me uberius
Benedic, ne maledictus
Hostis vincat amplius.

19. Sed luctando stem Invictus
Ab ejus versutiis.
Ne a Deo derelictus
Superer a vitiis.

20. Me, tu dictus Benedictus.
Salva a suppliciis,
Ut superni tecum victus
Perfruar deliciis.