ARTICULUS II.

Utrum sit consonum evangelicae perfectioni, quod unus se astringat voto ad obediendum alteri.

Secundo quaeritur, utrum sit consonum evangelicae perfectioni, quod unus astringat se voto ad obediendum alteri. Et videtur, quod non.

1. Lex enim evangelica est libertatis ;- sed subdere se homini per votum est necessitatis: ergo astringere se voto ad obediendum homini repugnat libertati evangelicae legis.

2. Item, Anselmus, in libro Cur Deus homo : " Deus hominem per semetipsum redimere voluit, ut in pristinam libertatem hominem revocaret "; sed in statu pristinae libertatis nullus erat astrictus ad obediendum alteri: ergo ad pristinam libertatem per Redemptorem reductus nulli ad obediendum debet esse astrictus.

3. Item, Gregorius : "Servitia, quanto minus debita, tanto magis grata".- ergo ab oppositis, quanto magis debita, tanto minus grata; sed astringens se voto ad obediendum homini tenetur illi obedire: ergo hic est minus gratus Deo. Sed illud, per quod efficitur homo minus gratus Deo, est contrarium evangelicae perfectioni: ergo etc.

4. Item, lex evangelica est iugum suave et onus leve : sed grave est homini per omnia obtemperare: ergo astringere se ad obediendum homini non concordat levitati evangelicae perfectionis.

5. Item, lex evangelica, quia est onus leve, non compatitur secum onus et servitutem legis scriptae: ergo cum gravius sit obedire indistincte praeceptis hominis, quam distincte obtemperare caeremoniis et praeceptis veteris legis: videtur, quod astringere se ad obediendum homini non possit esse cum perfectione evangelica.

6. Item, grave est obedire mandatis divinis: ergo multo gravius est obedire mandatis divinis pariter et humanis: sed qui ex voto subiicit se homini astringit se mandatis illius: ergo etc.

7. Item, Lucae sexto : Perfectus erit omnis, si sit sicut magister eius: sed de Christo non legitur, quod fuerit sub alio per votum: ergo alteri subdere se per votum non est perfectum, sed, ut videtur, potius superstitiosum.

8. Item, si votum obedientiae auget perfectionem virtutis obedientiae, cum iste gradus non fuerit in Christo, videtur, quod implens hunc gradum sit perfectior Christo: sed hoc est absurdum et inconveniens: ergo et inconveniens est dicere, quod voto se alteri subiicere augeat perfectionem virtutis obedientiae.

9. Item, Apostoli evangelicam perfectionem potissime in se habuerunt: sed nulli obedientiam devoverunt: ergo etc.

10. Item, videtur, quod istud facere sit praesumtuosum: quia aut talis reputat se sufficientem ad mandata divina implenda, aut non. Si non: ergo stulte facit, cum astrictus ad divina praecepta se obligat ad mandata humana implenda: si autem reputat se sufficientem ad implenda mandata divina, praesumtuosus est: ergo ulterius se obligare ad mandata hominis maius videtur iudicium praesumtionis.

ii. Item, si hoc est perfectionis vovere: ergo qui profitetur hoc, profitetur, se esse perfectum: sed hoc est praesumtuosum: ergo etc.

12. Item, velle praeesse iusto viro et perfecto est superbia et praesumtio: ergo consentire alii et cooperari, ut praesit, est consentire superbiae et praesumtioni; sed qui astringit se ad obediendum alteri consentit et cooperatur illi, ut praesit: ergo etc.

13. Item, hoc videtur esse periculosum: quia committere se homini, de cuius scientia et conscientia ignorat, est periculum: sed qui astringit se voto ad obediendum homini ignorat frequenter, an sit sapiens, vel bonus, seu de ipsius scientia et conscientia: ergo etc.

14. Item, quanto maioribus et pluribus homo astringitur, tanto est in maioribus periculis constitutus: sed qui vovet obedientiam homini pluribus astringitur, quam prius esset astrictus: ergo maioribus exponitur periculis: ergo etc.

15. Item, lex evangelica dissuadet iuramentum propter periurii periculum : sed qui vovet obedientiam homini est in periculo transgressionis voti: ergo talis offert se discrimini.

16. Item ostenditur, quod istud sit imperfectum. Qui enim peccat, alio suggerente, minus peccat, quam ille qui peccat, proprio motu instigante : ergo similiter qui obedit, alio imperante, minus meretur, quam qui sponte agit, seu solo Deo iubente: ergo qui astringit se voto ad obediendum alteri imperfectius agit, quam qui se non astringit: sed quod diminuit de perfectione dissonat ab evangelica lege: ergo etc.

17. Item, tanto perfectius quis movetur, quanto immediatius fertur in Deum: sed qui solo Deo obedit immediatius fertur in Deum, quam qui subiicit se homini: ergo etc.

18. Item, optimum genus monachorum est anachoretarum, secundum quod dicit beatus Benedictus in principio regulae suae ; sed tales non astringebantur voto ad obediendum homini: igitur ex voto subiicere se alii non est evangelicae perfectionis.

19. Item, qui infirmo praecludit viam sanitatis non curat perfectionem, sed a perfectione recedit: sed qui astringit se voto ad obediendum alteri claudit sibi multas vias ad salutem, cum talis ante votum multimode aliter salvari possit, quod non potest post votum: ergo talis imperfectissime agit,

30. Item, quanto quis pluribus subiicitur, tanto humilius et perfectius agit: sed qui vovet obedientiam pluribus male facit: ergo vovere obedientiam alteri non est humilitatis nec perfectionis.

Sed contra hoc sic obiicitur. 1. Matthaei tertio : Sic decet nos implere omnem iustitiam: Glossa: " Perfecta humilitas habet tres gradus: primus est subdere se maiori, secundus subdere se pari, tertius subdere se minori, in quo est omnis iustitia: et hoc Christus implevit": ergo si perfecta iustitia est subdere se alteri, hoc autem maxime fit per obedientiae votum: videtur, quod istud sit maxime perfectioni evangelicae consonum.

2. Item, primae Petri secundo : Subiecti estote omni humanae creaturae propter Deum: ergo quanto quis hoc efficacius facit, tanto perfectius agit: sed qui per votum alteri se subiicit, hoc efficacissime facit: ergo talis perfectissime agit.

3. Item, Gregorius : " Maius est relinquere se ipsum quam sua "; sed qui propter Deum relinquit sua perfecte facit: ergo qui relinquit se ipsum, perfectius. Sed hoc maxime fit in abnegatione voluntatis per obedientiae votum: ergo etc.

4. Item, Anselmus : Sicut voluntas Dei est origo omnis boni, sic voluntas propria est origo omnis mali"; sed qui perfecte amovet originem omnis mali perfectissime facit: ergo qui totaliter voluntatem propriam abnegat per votum obedientiae agit perfectissime.

5. Item, Hugo : "Obedientia est virtus, quae, propria voluntate postposita, animo amplectitur iniuncta opere implenda"; sed qui alteri obedientiam vovet maxime postponit propriam voluntatem: ergo etc

6. Item, Bernardus, homilia quadragesima secunda super Cantica : "Parum est, subditum esse Deo, nisi sis et omni humanae creaturae propter Deum: subdere paribus, subdere minoribus: sic enim decet nos implere omnem iustitiam "; sed hoc potissime fit astringendo se voto ad obediendum alteri: ergo etc.

7. Item, sufficiens iusliliu est servare divina mandata, ergo abundans super haee servare humana ; sed hoc facit qui alteri ad obediendum se subiicit.

8. Item, humilitas est consona perfectioni evangelicae: ergo summa humilitas est maxime consona eidem; sed astringere se voto ad obediendum alteri est maximae humilitatis: ergo etc.

9. Rem, liberalitas est consona evangelicae perfectioni ; sed hoc est summa liberalitas, cum homo propter Deum non solum dat sua , sed se ipsum, propriam voluntatem postponendo, per obedientiae votam: ergo etc.

10. Item, conformitas ad Christum est consona perfectioni evangelicae: sed Christus mera liberalitate subiecit se homini, Lucae secundo : Et erat subditus illis: ergo se ipsum alteri subiicere facit Christo conformem. Sed hoc maxime fit per obedientiae votum: ergo etc.

11. Item, quod maxime nos elongat a mundo maxime consonat perfectioni evangelicae ; sed astringere se voto ad obediendum homini maxime elongat nos a mundo, quia omne, quod est in mundo, aut est concupiscentia carnis, vel concupiscentia oculorum, vel superbia vitae , a quibus maxime elongamur per obedientiae votum: ergo etc.

12. Item, quod maxime nos elongat a diabolo maxime spectat ad perfectionem evangelicam ; sed velle subesse et non praeesse maxime nos elongat a peccato diaboli, qui omnino voluit praeesse sine subesse : ergo etc.

13. Item, omne, quod conformat nos caelesti hierarchiae, consonum est perfectioni evangelicae: sed in hierarchia caelesti videmus quod unus Angelus subiicit se obediendo alteri, et Angeli inferiorum ordinum sine repugnantia obediunt Angelis superiorum : ergo in hierarchia ecclesiastica quod unus homo subiiciat se obediendo alii, conformat nos ordini caelesti, ac per hoc est maxime consonum evangelicae perfectioni.