ARTICULUS I.

Utrum esse divinum sit summe necessarium.

Quaeritur ergo, utrum esse divinum sit summe necessarium. Et quod sic, videtur.

1. Omne immutabile et aeternum est summe necessarium ; sed divinum esse est hujusmodi: ergo etc.

2. Item, necesse est, omne, quod est nobilitatis et perfectionis, poni in Deo in summo: sed constans est, quod necessitas est magis quam scientia: ergo etc.

3. Item, omne, quod ita est; quod non potest non esse nec cogitari non esse, est necessarium in summo: sed divinum esse est hujusmodi : ergo etc.

4. Item, omne, quod habet esse a se et per se et secundum se, est omnino necessarium; sed tale est esse divinum, cum sit primum: ergo etc.

5. Item, impossibile est, necessitatem esse in effectu nisi per causam: ergo si in Deo non est necessi tas, in nullo est necessitas: ergo nihil est necessarium. Sed si nihil est necessarium, nihil est impossibile: ergo omnia sunt possibilia: ergo aliquid simul esse et non esse est possibile Sed hoc est absurdum : ergo etc.

6. Item, impossibile est, necessitatem esse in composito nisi per necessitatem existentem in simplici; ergo si simplicissimum caret necessitate, impossibile est, quod in aliqua complexione vel compositione sit ponere necessitatem. Sed hoc est absurdum, quod nulla argumentatio necessaria sit : ergo etc.

Contra: 1. Omne necessarium est determinatum ad sic et non aliter se habendum: omne determinatum ad aliquid est finitum ; sed divinum esse est infinitum: ergo etc.

2. Item, nihil, quod est indifferens ad opposita, est necessarium: sed divinum posse, velle et agere est indifferens ad opposita: ergo non est necessarium. Sed divinum posse, velle et agere est divinum esse: ergo divinum esse non est necessarium.

3. Item, nulli immutabili potest attribui aliquid mutabile, ergo nulli summe necessario potest attribui aliquid contingens: sed Deo attribuitur aliquid contingens: ergo etc.

4. Item, sicut impossibilitas repugnat potentiae, ita necessitas voluntati; sed divina potentia tanta est, quod omnia sunt ei possibilia, nec ponitur aliquo modo impossibilitas in Deo : ergo cum velle Dei sit perfectissimum, videtur, quod non patiatur necessitatem in esse divino.

3. Item, si causa est necessaria, et effectus ; sed Deus est causa omnium prima et summa et immediata: ergo si in Deo est necessitas, omnia sunt necessaria.

6. Item, quanto aliquid contingentius, tanto est indifferentius, et quanto indifferentius, tanto communius, et quanto communius, tanto simplicius : ergo a primo, quanto aliquid contingentius, tanto simplicius: ergo simplicissimum est contingentissimum, non ergo necessarium.

7. Item, omne necessarium scibile, sicut omne probabile opinabile ; sed omne scibile vel est principium demonstrationis, vel demonstratum: divinum autem esse neutrum est: ergo etc.

8. Item, quanto aliquid magis est necessarium, tanto est magis certum, et quanto magis certum, tanto magis notum ; sed divinum esse est maxime occultum: ergo etc.

9. Item, sicut frustra movetur quis, quia appetit impossibile , ita, quia timet necessarium: ergo si divina Maiestas est necessitas, ergo nullo modo est timenda. Sed hoc est falsum et absurdum: ergo etc.