ARTICULUS III.

De sanctimonia virginali.

Tertio quaeritur de sanctimonia virginali: et est quaestio, utrum virginalis continentia sit omnibus praeferenda. Et videtur, quod sic, auctoritate, exemplo et ratione; auctoritate sic.

1. Primae ad Corinthios septimo : Qui matrimonio iungit virginem suam bene facit, et qui non iungit melius facit: ergo continentia virginalis est praeferenda aliis continentiae differentiis, secundum auctoritatem Apostoli.

2. Item, hoc ipsum ostenditur exemplo Christi. Christus enim secundum humanam naturam fuit exemplum virtutis et totius christianae perfectionis ; sed constat, quod Christus fuit virgo: ergo virginalis continentia est omnibus praeponenda.

3. Item, hoc idem ostenditur exemplo beatissimae Mariae, matris Domini, cuius virginitatem non abstulit : ergo virginitas est prae omnibus commendanda.

4. Item, exemplo Ioannis evangelistae, quem Dominus maxime dilexit: et huius rationem reddit Hieronymus dicens: " Qui virgo electus a Domino, virgo in aeternum permansit".

5. Item, exemplo Joannis praecursoris Christi, quem constat virginem fuisse.

6. Item, exemplo Abel, qui virgo fuit: unde Augustinus, in libro de Mirabilibus sacrae Scripturae : "Tota iustitia haec est: virginitas, sacerdotium et martyrium, quae triplex iustitia in Abel fuit".

His omnibus exemplis praecipuis ostenditur,

quod virginitas seu virginalis continentia sit omnibus aliis continentiae partibus praeferenda.

Item, hoc ipsum ostenditur ratione sic.

7. Quod maxime facit nos sequi Christum est maxime praeferendum; sed virginitas maxime facit sequi Christum, Apocalypsis decimo quarto : Virgines enim sunt et sequuntur Agnum, quocumque ierit: ergo etc.

8. Item, quod maxime facit conformem Angelis est maxime commendandum; sed virginitas facit maxime conformem Angelis, quia, secundum Hieronymum , "in carne praeter carnem vivere angelica vita est, non humana ": ergo etc.

9. Item, continere bonum est, ergo magis continere magis bonum, et maxime continere est maxime bonum; sed maxima continentia est virginitas: ergo etc.

10. Item, honestum est bonum , ergo magis honestum magis bonum, et summe honestum summe bonum; sed in virginitate est summa honestas et puritas: ergo etc.

11. Item, "albius est quod nigro est impermixtius " : ergo pari ratione melius est quod est malo impermixtius: sed libido est fons omnis mali, virginitas autem maxime impermixta libidini: ergo etc.

12. Item, quod magis disponit ad actum nobilissimum est laudabilius: sed ad actum contemplationis, in quo requiritur maxima puritas, magis disponit virginitas: ergo etc.

Sed contra hoc obiicitur: I. Augustinus, de Bono coniugali : " Non est impar meritum continentiae in Ioanne, qui nullas expertus est nuptias, et in Abraham, qui filios generavit": ergo virginitas non est praeferenda coniugio.

2. Item, si oppositum huius est melius opposito illius, et hoc simpliciter est melius illo ; sed opposita fecunditas, scilicet Virginis Mariae, melior est quam virginitas: ergo simpliciter fecunditas melior quam virginitas: ergo etc.

3. Item maiora bona sunt praeferenda bonis mediis et minoribus - nam bona maiora sunt in virtutibus cum habitibus, bona media sunt in potentiis et viribus, bona minima sunt in rebus corporalibus - sed habitus continentiae coniugalis et vidualis est in mente, virginitas vero est in carne: ergo continentia vidualis et coniugalis est praeferenda continentiae virginali .

4. Item, bonum, quod quis non potest perdere invitus, melius est eo, quod quis potest perdere invitus ; sed virginitas est bonum, quod quis potest perdere invitus, ut patet in violenter oppressis: habitum autem continentiae coniugalis vel vidualis nullus posset perdere invitus: ergo etc.

5. Item, bonum, quod non potest perdi sine peccato, est magis eligendum eo, quod potest perdi sine peccato: sed habitus continentiae coniugalis vel vidualis non potest perdi sine peccato; virginitas autem sic, sicut patet in virgine, quae contrahit: ergo etc.

6. Item, " circa difficile est ars et virtus " ; sed difficilius est actum carnis expertum continere, quam nullo modo expertum: ergo maior difficultas est in continentia coniugali vel viduali quam in virginali: non ergo virginalis continentia praeferenda.

7. Item, quod magis reddit similem Deo magis est laudabile: sed generatio magis reddit similem Deo, in quo est summa fecunditas, quam ipsa virginitas: ergo etc.

8. Item, quod magis conformat hominem statui innocentiae est magis laudabile: sed in statu innocentiae non fuisset virginitas, sed generatio et fecunditas : ergo etc.

9. Item, " plura bona paucioribus sunt magis eligenda " ; sed in matrimonio sunt plura bona quam in virginitate: in matrimonio enim sunt fides, proles et Sacramentum, in virginitate autem unum solum: ergo continentia coniugalis praeferenda est continentiae virginali.

10. Item, quod magis consonat perfectioni naturae est magis laudabile; sed magis consonat perfectioni naturae generatio et fecunditas seu conium. lis continentia quam virginitas, quia " unumquodque tunc perfectum est, cum potest producere tale, quale ipsum est " : ergo etc.

11. Item, species praefertur individuo, et universale particulari : ergo quod facit ad perfectionem seu conservationem speciei necessario est praeferendum ei, quod facit ad perfectionem seu conservationem individui: sed continentia coniugalis facit ad conservationem speciei, continentia virginalis facit ad conservationem individui vel boni singularis: ergo etc.