ARTICULUS II.

De continentia viduali servanda et vovenda.

Secundo quaeritur de continentia viduali; et est quaestio, utrum continentia vidualis secundum legem evangelicam sit vovenda. Et quod sic, ostenditur auctoritate et ratione: auctoritate sic.

1. Matthaei decimo nono : Sunt eunuchi, qui te castraverunt propter regnum caelorum; qui potest capere capiat: sed se ipsum castrare propter regnum caelorum maxime fit per votum continentiae, et hoc proponitur omnibus volentibus assumere: ergo quilibet volens potest vovere continentiam secundum legem evangelicam.

2. Item, primae ad Corinthios septimo : Bonum est homini mulierem non tangere: ergo pari ratione bonum est mulieri virum non tangere: sed hoc non est bonum praecepti, sed consilii; consilia autem sunt vovenda: ergo non tangere mulierem est vovendum. Sed hoc est votum continentiae: ergo etc.

3. Item, paulo post : Dico autem non nuptis, sed viduis: bonum est illis.si sic permaneant: ergo secundum Apostolum bonum est manere in continentia viduali; sed bonum hoc est consilium: ergo licite potest aliquis vovere continentiam vidualem.

4. Item, ibidem : Si dormierit vir, liberata est mulier a lege vir; beatior autem erit, si sic permanserit: sed quod beatius est licite voveri potest: hoc autem est per votum continentiae vidualis: ergo etc.

5. Item, super illo verbo dicit Angustinus, de Viduitate : "Quod autem dico uni mulieri viduae dico omni viduae: Beatior erit, si sic permanserit ":

ergo hoc proponitur viduis omnibus: ergo cuilibet est licitum vovere continentiam secundum legein evangelicam.

6. Item, ibidem : Voto, omnes homines esse sicut me ipsum: sed ipse erat omnino continens et ad continentiam astrictus: ergo volebat, quod omnes ad continentiam essent astricti. Sed hoc fit per votum continentiae: ergo etc

7. Item, ad Romanos duodecimo : Obsecro vos, ut exhibeatis corpora vestra hostiam viventem, sanctam, Deo placentem; sed hoc fit maxime, quando caro dedicatur Deo per votum continentiae: ergo vovere continentiam est Deo placitum.

Item, hoc ipsum ostenditur ratione sic.

8. Quod elongat a concupiscentia carnis est bonum et laudabile: sed votum continentiae vidualis maxime elongat a concupiscentia carnis: ergo est bonum et laudabile.

9. Item, qui domat carnem laudabiliter agit, quia caro per concupiscentiam pertrahit ad peccatum ; sed hoc fit per perpetuam continentiam: ergo perpetuo continere est laudabile: ergo licite voveri potest.

10. Item, est bonum consilii, et est bonum praecepti: sed continentia non est bonum praecepti, quia sic omnes peccarent, qui nubunt: ergo est bonum consilii. Sed consilia vovenda sunt: ergo etc.

Sed contra: 1. Primae ad Corinthios septimo : Propter fornicationem unusquisque habeat suam uxorem, et unaquaeque suum virum: sed illud non est consilium, cum non sit opus perfectionis nec supererogationis : ergo est praeceptum: ergo quicumque vovet continentiam facit contra hoc praeceptum: ergo etc.

2. Item, primae ad Timotheum quinto : Volo, iuniores nubere, filios procreare: sed huic est contrarium votum continentiae: ergo Apostolus volebat contrarium voto continentiae: ergo continentia non est vovenda.

3. Item, primae ad Timotheum quinto : Vidua eligatur non minus sexaginta annorum; et ibidem: Adolescentulas viduas devita: ergo non videtur, quod castitas vidualis accipienda sit nisi in vetulis, nec hoc ob aliud nisi propter periculum: ergo non videtur tutum emittere continentiae votum.

4. Item, omne, quod repugnat divino praecepto, est vituperandum ; sed vovere continentiam repugnat divino praecepto, scilicet Genesis primo : Crescite et multiplicamini: ergo etc.

5. Item, omne, quod repugnat naturali diciamini, est vituperandum ; sed votum continentiae repugnat coniunctioni matrimoniali, quae consonat naturali dictamini : ergo etc.

6. Item, omne, quod repugnat communi utilitati, est vituperandum ; sed votum continentiae repugnat communi utilitati, scilicet generationi, in qua est conservatio speciei: ergo est vituperandum.

7. Item, quicumque se privat utili et rationabili remedio, divinitus instituto male facit; sed qui vovet continentiam privat se matrimonio, quod est sacramentale remedium, divinitus institutum: ergo etc.

8. Item, qui committit se periculo male agili sed qui vovet continentiam committit se periculo propter lubricum carnis: ergo etc.

9. Item, quod recedit a medio recedit a virtute, quia virtus consistit in medio ; sed omni tempore continere recedit a medio: ergo recedit a virtute: ergo etc.