ARTICULUS I.

Utrum sit consonum iuri naturali, quod homo obediendo subiaceat alteri.

Quantum ad primum sic proceditur. Videtur, quod sit consonum iuri naturali, quod homo obediat homini.

1. Pietas enim naturalis dictat, parentes esse honorandos ; sed honor parentum est in exhibitione reverentiae, exhibitio autem reverentiae est obtemperando et obediendo: ergo etc.

2. Item, lex decalogi scripta in corde hominis dictat per dictamen naturae ; sed ipsa hoc praecipit, scilicet parentes honorari: ergo illud est consonum iuri naturali. Hoc autem fit per obsequium obedientiae: ergo etc.

3. Item, ad Ephesios sexto : Filii, obedite parentibus vestris per omnia: sed paternitas et filiatio maxime consonant iuri naturali: ergo et filios parentibus obedire.

4. Item, ius naturae dictat ordinem: sed "ordo est parium dispariumque sua loca cuique tribuens dispositio", ut dicit Augustinus decimo nono de Civitate Dei : si ergo ordo est, quod unus subdatur alteri, et ius naturae dictat ordinem: dictat ergo, quod unus alteri debeat subiici.

8. Item, ius naturae dictat pacem inter domesticos: sed pax in domo est "ordinata imperandi obediendique concordia ": ergo iuri naturae competit imperare et obedire.

6. Item, ius naturale dictat, gradum esse servandum, " quia, si essent omnia aequalia, non essent omnia "; ubi autem gradus, ibi est superioritas et inferioritas; sed si inferius non subiaceat superiori, non servatur gradus: ergo etc.

7. Item, ius naturae dictat ordinem hierarchicum, qui descendit a summa hierarchia per angelicam usque ad humanam ; sed ordini hierarchico consonat, quod inferior superiori obtemperat: ergo etc.

8. Item, ius naturae dictat " reddere unicuique quod suum est "; sed honor maxime debetur homini stanti seu in statu innocentiae; honor autem exhibetur homini, dum obeditur: ergo etc.

9. Item, de dictamine legis naturae est "quod commune est apud omnes "; sed omnibus commune est regimen et imperium, sive subiectio et obedientia: ergo etc.

10. Item, de dictamine iuris naturalis est, quod homo totus obediat rationi rectae in se : ergo pari ratione ius naturae dictat, quod minus peritus et ignorans obediendo subiaceat magis perito et scienti: ergo videtur, quod homo obtemperet homini, consonum esse iuri naturali.

Sed contra hoc obiicitur sic. 1. Genesis primo : Faciamus hominem ad imaginem et similitudinem nostram, et praesil piscibus maris etc.; super quo verbo dicit Augustinus decimo nono de Civitate Dei: " Rationalem hominem ad Dei imaginem factum dominari noluit Deus nisi irrationalibus"; sed de dictamine naturae est, quod homo servet institutionem divinam: ergo iuri naturali consonat, quod homo non imperet homini, nec unus obediendo subiaceat alteri.

2. Item, Gregorius : "Omnes homines natura fecit aequales ": ergo ius naturae dictat aequalitatem ; sed ubi aequalitas, nulla est ibi superioritas et inferioras ; sed obedientia dicit superioritatem et inferioritatem :. ergo etc.

3. Item, vigesima secunda distinctione : "Cum culpa non exigit, omnes secundum rationem humilitatis aequales sumus sed in statu naturae institutae nulla fuisset culpa: ergo fuisset aequalitas, ergo nulla fuisset praelatio nec subiectio: ergo etc.

4. Item, ius naturae dictat, dignitatem imaginis esse servandam ; sed imago est immediate a Deo et soli Deo subiecta, quia, "nulla interposita natura, a prima Veritate formatur ": ergo videtur, hoc, quod homo subiaceat obediendo homini, esse contra dignitatem imaginis.

5. Item, lex naturae dictat, libertatem esse servandam: sed liberum arbitrium aequaliter est in omnibus : ergo aequaliter libertas in omnibus est servanda. Sed ubi subiectio et obedientia, non aequalis libertas: ergo etc.

6. Item, ius naturae dictat, caritatem esse servandam ; sed caritas facit unionem, conformitatem et aequalitatem : ergo privat omnem subiectionem et superpositionem: ergo etc.

7. Item, quod lex naturae dictat semper habet esse perpetuum ; sed omnis subiectio et obedientia evacuabitur, quia primae ad Corinthios decimo quinto : Cum evacuaverit principatus etc.; Glossa: "Dum durat mundus, homines hominibus praesunt": ergo etc.

8. Item, si lex naturae dictat unum correlativorum, dictat et reliquum : ergo si dictat esse obediendum, dictat etiam imperandum: ergo sicut potest appeti obedire et subesse sine peccato, pari ratione et appeti poterit imperare et praeesse. Sed hoc est falsum et inconveniens: ergo et illud, ex quo sequitur: ergo lex naturae non dictat imperare, ac per hoc nec etiam obedire.

9. Item, lex naturae dictat, honorem debitum Deo nulli alii esse reddendum ; sed honor debitus Deo exhibetur obediendo et obtemperando: ergo obe-dire est soli Deo reddendum, non ergo homini.

10. Item, lex naturalis est impressio facta a lege aeterna ; sed illa impressio movet animam in arduum, se autem subdere alteri obtemperando contrariatur arduo: ergo etc.