QUAESTIO VII An omnis quaesito sit quaestio medii

Aristoteles. 2. Post. cap. et text. 1. D. Thom. et Paul.Venetus ibid. Joan.de Magistris in secundum Post.quaest.2. Tartar. ibid. dub. 1.

Quod non videtur.Si omnis quaestio quaerat medium, erit processus in infinitum ; quia cum quaero utrum hoc sit, quaero an sit medium; et ulterius cum quaero an sit medium, quaero ulterius medium. Si igitur omnis quaestio sit quaestio medii, sic erit processus in infinitum.

Item,si omnis quaestio sit quaestio medii, quaero an omnis quaestio quaerat medium de seipso, aut medium de alio, aut aliud de medio. Non primo modo, quia quaerere idem de seipso nihil est quaerere. Nec medium de alio ; quia quaerens definitionem de definito, adhuc est quaerens idem de seipso ; et medium et definitio sunt eadem, nec est quaerere aliud de medio, propter eamdem rationem. Similiter propter aliam rationem; quia definitio quae est medium in demonstratione, demonstrari non possunt: ergo non est quaeribile, quia quaeribile, et scibile, sunt eadem in numero.

Item,si omnis quaestio sit quaestio medii, tunc quaestio si est, esset quaestio medii. Et per consequens, esse posset demonstrari ; quia si esse haberet medium, per illud posset demonstrari.

Item, illud quod praesupponitur, non est quaeribile ; sed medium praesupponitur in qualibet quaestione: ergo medium non est quaeribile, ergo, etc. Ad oppositum est Aristoteles. Ad quaestionem dicitur, quod omnis quaestio est quaestio medii. Hujus ratio est,

quia quaestio quaerit aliquid quod est dubium, et postea scibile certificatum per medium ; sed quod est certificatum per medium, medium praesupponit per quod certificatur, ergo, etc.

Item, Aristoteles probat hoc inductive, quia omnis quaestio est quaestio causae ; et causa et medium idem sunt, ergo, etc. Minor patet per inductionem Aristotelis, quia quaestio si est, et quaestio quia est, quaerunt utrum sit aliquod medium; quia si quaeram utrum Luna eclipsetur, quaero an eclipsis habeat aliquod medium. Similiter propter quid, quaerit causam, ut manifestum est ex modo quaerendi, sed quid est, et propter quid sunt eadem; (non enim differunt nisi in modo quaerendi. Idem enim quaerunt secundum rem) sed quaestio propter quid, quaerit medium et causam : ergo quaestio quid est ; ergo simpliciter omnis quaestio quaerit medium et causam,

Intelligendum tamen est, quod quaestio propter quid, alio modo quaerit medium, quam quaestio si est, quia quaestio si est, vel quia est, quaerunt an sit aliquod medium, non ex modo quaerendi, sed concomitanter , sed quaestio propter quid, quaerit medium ex modo quaerendi. Similiter in alio est differentia ; quia quaestio si est, vel quia est, quaerunt absolute de medio ; sed quaestio propter quid, praesupponit medium esse, et quaerit discretionem medii. Ad primum argumentum dicitur, quod omnis quaestio est quaestio medii ; ut per medium fiat nota de eo quod quaeritur. Non tamen quaerit de medio tanquam de subjecto, hec est quod medium esset subjectum de quo medium quaeritur. Per hoc ad formam. Si quaeram an Luna eclipsetur, quaero an sit medium, id est,ego quaero an sit medium per quod fiat notitia de illo quaesito ; sed non quaero an medium sit, tanquam quaerens medium esse de medio, tanquam de subjecto; et ideo non est processus in infinitum.

Ad aliud, quod quaestio nec quaerit medium de seipso, nec aliud de medio, nec medium de alio. Non enim quaerit aliud de medio quaesito, tanquam de subjecto quaesito ; et ideo nullo istorum modorum quaerit, sed quaerit medium, tanquam per illud fiat notitia passionis de subjecto.

Ad aliud dicitur, quod quaestio si est, est quaestio medii, et tamen demonstrari non potest per illud medium ; quia non est ens habens esse in aliquo genere,- sed est illud quo aliud est, unde non quaeritur, ut demonstretur, sed quaeritur ut aliqua alia via fiat notum. Linconiensis tamen vult dicere, quod esse demonstretur per definitionem rei.

Ad aliud, quod omnis quaestio praesupponit medium: et ideo sequitur quod nulla quaestio quaerit medium ; ita quod illud medium demonstretur; sed quaestio dicitur quaerere medium, ut per illud medium fiat dubitabile prius notum. Per hoc ad formam dicitur, quod haec consequentia non valet, Omnis quaestio praesupponit medium; ergo nulla quaestio quaerit medium, sub hoc intellectu, ut per idem medium fiat notitia: unde quaestio propter quid aliquod medium praesupponit.

Tu dicis, quod quaestio quia est, quaerit utrum sit medium, et ita quomodo nihil praesupponit. Dicendum quod praesupponit medium,saltem esse secundum aptitudinem quia quaerit utrum sit aliquod medium in actu, sed quaestio propter quid discretionem medii quaerit, et actualitatem medii praesupponit.