Sermo II .

Solliciti servare unitatem Spiritus in vinculo pacis, ad Ephesios quarto .

In verbis his tria facit Apostolus: hortatur enim primo ad procinctum debitae operationis, ibi: Solliciti: secundo, ad zelum fraternae dilectionis, ibi: servare unitatem Spiritus: tertio, ad nexum evangelicae confoederationis, ibi: in vinculo pacis.

I. Circa primum nota, quod sollicitari debemus circa tria, scilicet circa divini cultus promotionem: Iosue vigesimo tertio : Estote solliciti, ut custodiatis cuncta, quae scripta sunt in volumine Legis Moysi.

Interni status conservationem; Deuteronomii quarto: Custodi temetipsum et animam tuam sollicite.

Afflicti proximi consolationem: secundae ad Timotheum primo: Det misericordiam Dominus Onesiphori domui etc. Sollicite me quaesivit et invenit.

II. Circa secundum nota, quod debemus servare Spiritus unitatem ad Dominum dupliciter, scilicet per studium assimilationis in voluntatis conformatione: primae ad Corinthios sexto : Qui adhaeret Domino unus spiritus est.

Per amplexum crucis in terribilium aggressione: Canticorum quarto: Vulnerasti cor meum, soror mea, sponsa: vulnerasti cor meum in uno oculorum tuorum et in uno crine colli tui.

Ad proximum dupliciter, scilicet per benevolentiam affectionis: Actuum quarto : Multitudinis credentium erat cor unum et anima una.

Per subventionem operis: primae ad Corinthios duodecimo: Si quid patitur unum memorum, compatiuntur omnia membra.

Ad animum proprium dupliciter: per integritatem mentis: Canticorum sexto : Una est columba mea etc.

Per captivationem carnis: Nehemiae quarto: Una manu sua faciebat opus et altera tenebat gladium.

Ad hoc autem, quod unitas Spiritus possit tribus modis praefatis servari, requiruntur tria, scilicet contemptus mundanae prosperitatis: Ecclesiastae septimo : Virum de mille unum reperi etc. - Gustus supernae suavitatis: Lucae decimo: Martha, Martha, sollicita es et turbaris erga plurima. Porro unum est necessarium. - Sensus perfectas humilitatis: Isaiae quinquagesimo primo: Unum vocavi eum et benedixi ei et multiplicavi eum.

III. Circa tertium nota, quod ad hoc, quod vinculum pacis in familia vel congregatione vel societate valeat custodiri, quatuor haec requiruntur, scilicet promptitudo obedientiae in honestis obsequiis: ad Romanos decimo quarto : Quae pacis sunt sectemur, et quae aedificationis sunt in invicem custodiamus. - Fortitudo patientiae in molestiis perferendis: Psalmus: Cum his qui oderunt pacem, eram pacificus. - Mansuetudo eloquentiae in colloquiis: primi Regum vigesimo quinto: Et dicetis: Sit fratribus meis et tibi pax et domui tuae pax.

Dissimulatio displicentiae in visis vel auditis vel illatis ; Matthaei quinto : Beati pacifici, quoniam filii Dei vocabuntur.