Sermo IV .

Item, sermo fratris Bonaventurae in domo Fratrum.

Propheta magnus surrexit in nobis, Lucae septimo .

In verbis his commendant turbae Christum a tribus, scilicet a doctrinae claritate perspicua: ab efficaciae potestate mirifica, et a vitae sanctitate dignissima.

I. et II. Circa primum et secundum nota, quod Dominus Iesus fuit Propheta magnus magnitudine septiformi, scilicet magnitudine auctoritatis praecelsae ad miracula exhibenda: Psalmus : Quoniam magnus es tu et faciens mirabilia.

Veritatis aeternae ad documenta seminanda; Ieremiae decimo: Magnus es tu, et magnum nomen tuum in fortitudine. Pariter insipientes et fatui probabuntur, doctrina vanitatis eorum lignum est.

Bonitatis summae ad suffragia impartienda; Psalmus: Magnus Dominus et laudabilis nimis.

Suavitatis intimae ad solatia communicanda; Lucae primo : Erit magnus coram Domino et Spiritu sancto replebitur adhuc ex utero matris suae.

Sanctitatis praeclarae ad exempla tribuenda: Ecclesiastici quadragesimo sexto: Fuit magnus secundum nomen suum, maximus in salutem electorum Dei etc. - Claritatis famae ad divina praeconia excitanda: Malachiae primo: Magnum est nomen meum in gentibus.

Aeternitatis gloriae ad bona merita retribuenda sive remuneranda; Lucae primo : Hic erit magnus et Filius Altissimi vocabitur, et dabit illi Dominus Deus sedem David patris eius, et regnabit in domo Iacob in aeternum.

III. Circa tertium nota, quod surrexit Dominus in mundo ad aedificationem septiformiter. Surrexit enim sicut stella radiantissima ad illuminandum mundum caecum; facula ardentissima ad inflammandam mundum tepidum: rosa fragrantissima ad recreandum mundum angustatum ; regula ordinatissima ad dirigendam mundum devium: margarita pretiosissima ad confortandum mundum debilitatum ; sapientia

aeterna ad pascendum mundum famelicum: vita indeficientissima ad suscitandum mundum mortuum propter primum peccatum etc.