Sermo III .

Item, sermo fratris Bonaventurae coram rege et regina Franciae et familia tota, in capella.

Pax vobis, I oannis vigesimo .

Verbum est veri Samsonis et exemplum veri leonis de quo defuncto comedenti egressa est dulcedo haec. In hoc verbo, in quo discipulis pacem annuntiat, pacem optat, ad pacem invitat, secundum quod haec verba possunt tripliciter accipi, scilicet indicative , et sic est verbum reconciliationis perfectae; optative, et sic est verbum dilectionis eximiae; hortative, et sic est verbum informationis salutiferae.

Secundum primum modum annuntiat Christus resurgens pacem reconciliationis inimicitiae habitae inter hominem et Deum propter praecepti transgressionem; inter hominem et Angelum propter impeditam Angelorum restaurationem; inter hominem et hominem propter diversarum legum aemulationem. Christus autem fecit hanc triplicem pacem: primam ut mediator, secundam ut pacis emptor, tertiam ut lapis angularis. Propter quae Christus ter dicit in Evangelio hodierno: Pax vobis.

Secundum modum autem secundum optat eis pacem unionis sive tranquillitatis cordis, quam in testimonio reliquerat, qua quidem nihil pretiosius ad acquirendum, nihil delectabilius ad possidendum, nihil felicius ad conservandum. Propter quae tria, Ioannis decimo quarto , in sermone ter pacem nominavit et eis recommendavit dicens: Pacem relinquo vobis, pacem meam do vobis; ut in me pacem habeatis, in mundo pressuram habebitis.

Secundum tertium modum hortatur eos ad pacem con versati onis , quae quidem consistit in custodiendo se a noxiis vitiis; Psalmus : Pax multa diligentibus legem t uam; ad Romanos decimo quinto: Deus autem spei repleat vos omni gaudio et pace in credendo.

In conformando se ceteris; Matthaei quinto: Beati pacifici, quoniam filii Dei vocabuntur.

In neminem laedendo verbis aut factis; tertii Regum secundo : Pacificum est ingressus tuus? Qui respondit: Pacificus.