Sermo II .

Dominica quarta post Pentecosten. Sermo fratris Bonaventnrae in Capitulo Parisius, de mane.

Duc in altum, et laxate retia vestra in capturam, Lucae quinto .

In verbis his hortatur Salvator praelatos et praedicatores Evangelii ad duo, scilicet ad studiosum zelum animarum, ibi: Duc in altum: quasi (dicat): animas demersas emergere sit vestrum propositum ; et ad effectivum lucrum earum demersarum in profundum quadriformiter, scilicet vilitatis, caecitatis, calamitatis, mortalitatis, ibi: et laxate retia vestra in capturam: quasi (dicat): lucramini animas, quas diabolus conatur auferre.

1. Quantum ergo ad primum dicit: Duc in alium. Circa quod nota, quod debemus ducere animas quadrupliciter in altum, scilicet in altum Maiestatis praecelsae ad venerandum numina omnipotentiae; Ecclesiastae septimo : Et alta profunditas, quis inveniet eam? quasi dicat: rarus, nisi devotus et humilis. - Claritatis supremae ad speculandum lumina sapientiae; ad Romanos undecimo: O altitudo divitiarum sapientiae et scientiae Dei: quam incomprehensibilia sunt iudicia eius et investigabiles viae eius ! - Suavitatis aeternae ad degustandum charismata gratiae; Ecclesiastici quadragesimo tertio: Altitudinis firmamentum pulcritudo eius est, species caeli in visione gloriae.

Aeternitatis gloriae ad desiderandum praemia vitae; Psalmus : Mirabilis in altis Dominus. Testimonia tua credibilia facta sunt nimis: domum tuam decet sanctitudo, Domine, in longitudinem dierum.

II. Circa secundum nota, quod laxare debemus retia in capturam lucrando et capiendo animas quadriformiter, scilicet verbo eruditionis salutiferae; Lucaequinto : Ecce, ex hoc iam homines eris capiens.

Exemplo conversationis evangelicae ; secundae ad Corinthios septimo: Capite nos. Neminem laesimus, neminem corrupimus, neminem circumvenimus.

Suffragio orationis devotae; Canticorum secundo: Sonet vox tua in auribus meis; vox enim tua dulcis et facies tua decora. Capite nobis vulpes parvulas, quae demoliuntur vineas: nam vinea nostra floruit.

Beneficio supportationis caritativae; secundae ad Corinthios duodecimo : Cum essem astutus, dolo vos cepi etc.