Sermo III.

Item, sermo fratris Bonaventurae coram rege Franciae et familia.

Benedictus, qui venit in nomine Domini, Matthaei vigesimo primo.

Adventus Domini Iesu hodiernus in Ierusalem describitur in istis verbis in Evangelio processionis lectis dupliciter, scilicet ut universaliter gratiosus e t ut universaliter fructuosus. Primum, ibi: Benedict us; secundum, ibi: qui venit in nomi ne Domini.

I. Fuit autem Christus benedictus in ingressu quantum ad incarnationis mysterium; Lucae primo: Benedictus fructus ventris tui.

In progressu quantum ad conversationis speculum; Deuteronomii trigesimo tertio: Benedictus i n filiis Aser, sit placens fratribus suis.

In egressu quantum ad passionis medicamentum; Deuteronomii vigesimo octavo: Benedict us eris tu ingrediens et egrediens.

In regressu quantum ad ascensionis tropaeum; Danielis tertio : Benedictus es in firmamento caeli et laudabilis et gloriosus in saecula .

II. Venit vero hodie in Ierusalem ut rex ad dirigendum deviantes; Zachariae nono : Exsulta satis, filia Sion; iubila, filia Ierusalem. Ecce, rex tuus venit tibi iustus et salvator.

Ut sponsus ad cohabitandum inter diligentes; Matthaei vigesimo quinto: Ecce, sponsus venit etc.

Ut amicus ad convescendum inter omnes; Lucae undecimo: Amicus meus venit de via ad me etc., totum

Ut salvator ad redimendum peccatores; Ioannis tertio : Non venit , ut iudicet mundum etc.

FERIA SECUNDA post dominicam in palmis.

Sermo

Ante sex dies Paschae venit Iesus Bethaniam, Ioannis duodecimo .

Hic moraliter nobis designatur via salutis nostrae quantum ad tria, scilicet quantum ad rectitudinem itineris, ibi: Ante sex dies; quantum ad utilitatem finis, ibi: Paschae; quantum ad prudentiam dirigentis, ibi: Iesus.

I Quantum ad primum notandum, quod per senarium dierum intelligitur exercitium spirituale quoad sex illuminationes, quas facit in anima sol spiritualis, per praesentiam gratiae irradians.

Primus est pudor in recordatione flagitii; Psalmus : Tota die verecundia mea contra me est, et confusio faciei meae cooperuit me; et hoc propter puritatem contritionis, confessionis et operationis, vel propter peccatorum magnitudinem, quia tam magna sunt, quantus est ille qui offenditur; propter multitudinem, quia peccator omnibus rebus abutitur; propter turpitudinem, quia anima, quanto pulcrior creatura, tanto foetidior per peccatum efficitur.

Haec dies respondet primae diei creationis, in qua facta est lux. Nam sicut homo non erubescit de nocte, sed de die; sic peccator ad aperta.

Secundus est timor in circumspectione sui iudicii; Psalmus : Ab altitudine diei timebo etc, id est a profunditate abyssalis iudicii, quia erit infallibile, inflexibile, infugibile: infallibile , quia nihil iudicem poterit latere; inflexibile, quia nullus poterit sententiam revocare; infugibile, quia nec quisquam poterit fugere.

Ista dies respondet secundae diei, in qua factum est firmamentum dividens aquas caelestes ab inferioribus; sic per timorem iudicii homo stabilitur in bono et a flexibilitate mundana sequestratur.

Tertius est dolor ex consideratione damni; Psalmus : Tota die contristatus ingrediebar; et hoc propter amissionem divinae gratiae sive amicitiae, propter vulnerationem naturae, propter amissionem vitae praeteritae.

Et haec respondet tertiae diei, in qua apparuit terra arida germinans herbas et fructus faciens. Nam cor humanum, quamdiu coopertum est aquis carnalium affectionum, nihil puritatis potest habere nec fructum boni operis producere.

Quartus est clamor in imploratione subsidii; Psalmus : Quoniam ad te clamavi tota die etc. Clamandum est et invocandum modo auxilium Trinitatis, modo patrocinium beatae Virginis, modo subsidium totius Ecclesiae triumphantis.

Et ista respondet quartae diei, in qua facta sunt luminaria caeli, quia tunc impetrantur charismata gratiarum; et hoc est sapientiae quantum ad devotionem, discretionis quantum ad vitae gubernationem, vigoris quantum ad virtuosam operationem; quae tria intelliguntur per solem, lunam et stellas.

Quintus est rigor in exstinctione incentivi; Psalmus : Propter te mortificamur tota die etc; et hoc excludendo et mortificando vanitates spirituales, voluptates carnales et cupiditates temporales.

Et hoc respondet quintae diei, in qua producti sunt pisces in aquis, qui inde extracti moriuntur; sic Religiosus extra rigorem disciplinae positus statim interficitur.

Sextus est ardor ex appetitione Sponsi; Canticorum secundo : Dilectus meus mihi, et ego illi, qui pascitur inter lilia, donec aspiret dies, et Minentur umbrae.

Haec est sexta dies et sexta hora, in qua Sponsus non solum diligitur, sed etiam diligit et dilectionem suam miro modo ostendit. Nam sextahora passus est; Canticorum primo: indica mihi , quem diligit anima mea, ubi pascas, ubi cubes in meridie, ne vagari incipiam etc Et hoc respondet sextae diei, in qua factus est homo ad imaginem Dei et bestiis terrae et aliis creaturis praelatus. Nam per ardorem et desiderium Dei anima deiformis efficitur, et omnibus motibus bestialibus sensualitatis mens et ratio, secundum quod possibile est, dominantur.

Postea sequitur septima dies, scilicet paschalis, quae sopor potest nominari, quae est quietatio in Deo ex contemplatione et gustu divinae dulcedinis; Psalmus : Melior est dies una i n atriis t uis super millia. Elegi abiectus esse etc.

Sciendum est autem, quod hoc fuit in Bethania, quae interpretatur domus obedientiae, domus afflictionis, domus doni Dei, domus gratificato Domino; per quae intelligitur recte Religio beati Francisci , quae est domus obedientiae, et in qua obediendum est sine contradictione in voluntate, sine murmure in sermone, sine mora in exspectatione.

Item, est domus abstinentiae; ibi castitas Deo offertur, in qua intelliguntur quaedam substantialia, ut vitatio omnis carnalis corruptionis tam opere quam voluntate; quaedam adminicula, ut multitudo asperitatis; quaedam medicantia, ut fuga suspecti consortii.

Sed dicitur gratificato Deo per paupertatem; nam ubi est avaritia vel proprietas in Religioso, non Deus, sed idolum colitur ab ipso. Ad paupertatem veram et perfectam requiruntur: nihil sibi appropriare, nihil habere vel retinere, nihil dare vel recipere sine licentia praelati. Rogemus etc.