Sermo VI.

Item, sermo fratris Bonaventurae editus in Vigilia Nativitatis coram canonicis Lugduni et aliis multis in choro ecclesiae cathedralis.

Orietur vobis Umentibus nomen meum sol iustitiae, et sanitas in pennis eius, Malachiae quarto .

Vespera diei praesentis cum nocte imminenti magnam indicit reverentiam Angelis et hominibus, quia plenius referta, pressius fecunda mysteriis caelestibus. Mysteria vero sunt haec: intemeratae Virginis benedicta fecunditas, superbenedictae Prolis sublimis simul et singularis humilitas, beati Ioseph officiosa sedulitas, pastorum simplicium devota credulitas, angelicorum spirituum nova iucunditas, totius humani generis inchoata felicitas, christianae religionis initiata claritas. Ad quae omnia oculum habens Malachias Propheta, aeterni radii luce perfusus, inquit quod praemisi: Orietur vobis etc. In quibus verbis duo nota, scilicet Filii Dei dignativam per carnem nativitatem , ibi: Orietur vobis timentibus nomen meum sol iustitiae; ipsius nativitatis vivam et expressam utilitatem, ibi: et sanitas in pennis eius.

I. Quantum ad primum nota, quod timentibus nomen suum ortus est in carne Dei Filius sicut sol in firmamento intelligentias ad universalem irradiationem et inflammationem cogitantium; primi Regum undecimo: Cras erit vobis salus, cum incaluerit sol.

Sicut fons in paradiso conscientias ad universalem mundificationem et irrigationem affectuum; Genesis secundo: Fons ascendebat e terra, irrigans universam superficiem terrae.

Sicut flos in rosario Ecclesiae ad universalem recreationem et confortationem spirituum; Canticorum secundo: Ego flos campi et lilium convallium; Ecclesiastici quinquagesimo : Quasi flos rosarum in diebus vernis.

Sicut speculum in universo mundialis machinae ad universalem emendationem et correctionem defectuum; Sapientiae septimo: Candor est enim lucis aeternae et speculum sine macula Dei maiestatis et imago bonitatis illi us .

II. Habuit autem Christus natus pennas , in quibus consistit sanitas animarum et quibus volavit et volare voluit suos ad astra, scilicet pennas puritatis sanctimoniae, humilitatis vitae, veritatis doctrinae, caritatis fraternae, pietatis animae, paupertatis extremae, sanctitatis praeclarae. De quibus pennis dicitur in Psalmo : Quis dabit mihi pennas sicut columbae, id est, sicut habuit Christus, vera columba. De quibus dicitur: Pennae columbae deargentatae, et posteriora dorsi eius in pallore auri, quia omnia, quae fecit constitutus in carne, fulgent auro aeternae sapientiae; Isaiae quadragesimo: Assument pennas sicut aquilae, id est ad exemplum Christi, qui sic ad caelos volavit; current et non laborabunt.