Sermo III .

Item, sermo fratris Bonaventurae editas in doma Praedicatorum Parisius.

Dum iret Iesus in Ierusalem, transibat per mediam Samariam et Galilaeam. Et cum ingrederetur quoddam castellum, occurrerunt ei decem viri leprosi, Lucae decimo septimo .

In verbis his mystice intellectis exprimitur mysterium nostrae salutis, in quibus tria notantur, scilicet proemium aeternae beatitudinis per iter in Ierusalem, quod significat processum animae in Deum vel in bonum; meritum perfectae virtutis, cum dicitur, quod transibat per mediam Samariam et Galilaeam, ubi intelligitur duplex vita, scilicet activa et contemplativa ; remedium humanae infirmitatis, cum subditur, quod cum ingrederetur quoddam castellum, occurrerunt ei decem viri leprosi. Omissis autem primo et secundo, nota, quod secundum Augustinum , quod si lepra est haeresis inficiens radicem veritatis, supponitur, quod sit infectiva humorum radicalium materialiter sumta: per quod intelligimus depravationem intentionis. Quoniam autem corpus hominis ex quatuor humoribus constat, scilicet sanguine, cholera, flemmate, melancholia, ex quibus infectis secundum eventum oriuntur quatuor genera leprae generalia correspondentia singulis humoribus infectis, scilicet Tyria, quae est ex corruptione sanguinis; leonina, quae est ex corruptione cholerae; alopecea, quae est ex corruptione Seminatis: elephantina, quae est ex corruptione melancholiae.

Ex his quatuor humoribus creantur quatuor affectiones animae, scilicet ex sanguine gaudium, ex cholera spes, ex flemmate dolor, ex melancholia timor. Quatuor autem haec genera leprae significata sunt in mysterio per illos quatuor leprosos, qui erant iuxta introitum portae Samariae, quarto Regum septimo . Geruntur in mysterio: quando homo inordinatur ex gaudio ad faciendum contra decalogum aliquid delectabile, corrumpitur humor sanguinis et incurrit lepram Tyriam, quam habuit Naaman, quarti Regum quinto. - Quando quis inordinatur ex spe ad faciendam aliquid contra decalogum per praesumtionem impunitatis, corrumpitur humor cholerae, et incurritur lepra leonina, quam habuit in mysterio Ozias, secundi Paralipomenon vigesimo sexto.

Quando quis inordinatur ex dolore ad faciendum aliquid contra decalogum ex affectione malignitatis, corrumpitur humor Seminatis, et incurritur lepra alopecea, quam habuit in mysterio Maria, Numerorum duodecimo . -Quando quis deordinatur ex timore ad faciendam aliquid contra decalogum ex desperatione salutis, tunc corrumpitur humor melancholiae, et incurritur lepra elephantina, quam habuit in mysterio Giezi, quarti Regum quinto.

Prima lepra curatur de facili per humilitatem contemplationis: secunda curatur, de difficili tamen, per veritatem confessionis: tertia curatur per pietatem satisfactionis: quarta curatur per virtutem gratiarum actionis. Haec enim quatuor remedia adhibentur his decem leprosis significantibus omnes praevaricationes decalogi. Nam in hoc Evangelio primae leprae datur curationis remedium, ut dicatur: Iesu, praeceptor, miserere nostri. De secunda vero dicitur: Ite et ostendite vos sacerdotibus. De tertia vero dicitur, quia, dum irent, scilicet satisfacientes, mun-dati sunt. De quarta vero additur, quia unus autem ex illis, ut vidit, quia mundatus est, regressus est, cum magna voce magnificans Deum.