Sermo V .

Sermo fratris Bonaventurae in domo Fratrum, Lugduni.

Ut filii lucis ambulate . Duo facit hic Apostolus: primo hortatur ad sapientialium actuum et gestuum claritatem; secundo, ad omnis boni sedulitatem. Primum, ibi: Ut filii lucis; secundum, ibi: ambulate .

Circa totum nota, quod ad hoc, quod ambulemus digne et fructifice, debemus ad similitudinem materialis lucis esse filii lucis, id est in sancta luce esse : gloriosi per eminentiam conversationis pretiosae; nam sicut lux excellit omnia corpora, sic nos debemus alia hominum genera excellere; Isaiae sexagesimo : Surge, illuminare, Ierusalem etc.

Splendidi per refulgentiam claritatis sapientiae; Matthaei quinto: Vos estis lux mundi etc.

Deliciosi per affluentiam suavitatis aeternae; Ecclesiastae undecimo: Dulce lumen, et delectabile est oculis videre solem.

Alti per impermixtionem omnis contrarietatis culpae; Genesis primo : Fiant luminaria in firmamento caeli et dividant diem ac noctem, ut luceant in firmamento coeti et illuminent terram.

Largiflui per condescensionem pietatis Christi ; Isaiae trigesimo: Erit lux lunae sicut lux solis, et lux solis erit septempliciter sicut lux septem dierum.

Incorrupti per aeternitatem sancti propositi ; Ecclesiastici vigesimo quarto: Ego feci in coetis, ut oriretur lumen indeficiens.

Inclyti per victoriositatem triformis unionis; Esther undecimo : Lux et sol ortus est, et humiles exaltati sunt et devoraverunt inclytos.