Sermo VI

Sermo fratris Bonaventurae prima Dominica de Adventu in conventu Fratrum Montispessulani coram Fratribus tantum, quem fecit rogatus in die sanctae Agathae , quia Fratres communicare debebant.

Qui timent Dominum praeparabunt corda sua, et in conspectu illius sanctificabunt animas suas, Ecclesiastici secundo .

Tempus istud a beato Petro ordinatum fuit, scilicet Adventus Domini, et in eo ieiunium constituit circa decimum octavum annum post ascensionem Domini, post conditionem Evangeliorum Matthaei et Marci; ut Christi fideles Nativitatem Christi mundius et dignius praevenirent, devotius celebrarent et divinis Officiis sive laudibus et praedicationibus huius temporis studiosius intenderent, advertentes intentionem sanctorum Patrum, quod quatuor Dominicae istae, quamvis principaliter quantum ad Officia versentur circa Christi adventum in carnem et ad iudicium ; tamen duos alios adventus designant, scilicet in mentem per gratiam novam et ad mortem per aeternam gloriam, de quibus etiam memoriam consequenter agunt, sicut prudenter intell igens advertere potest.

Sapiens ergo, caelesti lumine radiatus, quasi pro isto tempore loqueretur , dicit : Qui timent Dominum etc. In quibus verbis triatanguntur , quae homines ad praeveniendam devote Christi propinquam Nativitatem disponunt, scilicet divina reverentia ,interna munditia, sancta et religiosa vita. Primum tangitur ibi: Qui timent Dominum; secundum, ibi: praeparabunt corda sua; tertium, ibi: et inconspectu illius sanctificabunt animas suas.

Circa haecomnia nota, quod qui volunt digne praeparari ad celebrandum Christi desiderativam Nativitatem debent esse: veneratores Maiestatis aeternae; primi Regum septimo : Praeparate corda vestra Domino et servae ei soli, et eruet vos de manu Philisthiim.

Cultores castitatis mundissimae; Apocalypsis decimo nono: Venerunt nuptiae Agni, et uxor eius praeparavit se.

Zelatores sanctitatis vitae; Psalmus : Paratus sum et non sum turbatus, ut custodiam mandata tua.

Amatores caritatis fraternae; Lucae tertio : Parate viam Domini, rectas facite semitae eius; et Genesis vigesimo quarto: Ingredere, benedicte Domini, cur foris stas? Praeparavi domum et locum camelis etc.

Speculatores veritatis sapientiae; primi Esdrae septimo : Esdrae praeparavit cor suum, ut inuestigaret legem Domini.

Possessores tranquillitatis internae; Amos quarto: Praeparare in occursum Dei tui, Israel.