Sermo III .

Item, sermo fratris Bonaventurae in domo domini Papae apud Urbem veterem, coram consistorio generali.

Magister, quid faciendo vitam aeternam possidebo ?

Quamvis iste legis doctor tentatione proposuerit Domino verba ista, tamen propter responsionem Domini subsecutam ad animarum aedificationem dedit nobis materiam proponendi ea pie et vere. Possumus ergo dicere catholice, quod in verbis istis tria tanguntur: Primum est devota recognitio fontalis sapientiae in Verbo incarnato; secundum est necessaria obligatio merendi in genere humano: tertium est Qualis aviditas, quae est et debet esse in cuiuslibet hominis animo. Primum, ibi: Magister: secundum, ibi: quid faciendo: tertium, ibi: vitam aeternam possidebo.

Circa totum nota, quod Dominus Iesus est principalis instructor, magister et doctor, secundum Augustinum et Dionysium, in caelo et in terra. Ipse enim solus docet Angelos quantum ad novem ordines, bonos homines quantum ad choros omnes iustos sive iustorum animas spirituales, tenens ipse cathedram magisterii sui in caelo et in Ecclesia, scilicet triumphanti: sedens est super sedem Maiestatis aeternae. Docet maneriae praemissae: Seraphim et Apostolos experiri et contemplari sive sursum extendi ad caritatem sive amorem fontalem; Cherubim et Doctores experiri et contemplari sive sursum extendi ad veritatem sive splendorem originalem: Thronos et Confessores atmos experiri et contemplari sive sursum extendi ad suavitatem sive saporem imperturbabilem ; Dominationes et Martyres experiri et contemplari sive sursum extendi ad maiestatem inamissibilem ; Principatus et pastores experiri et contemplari sive sursum extendi ad nobilitatem incomparabilem sive dignitatem sempiternalem; Potestates et reges experiri et contemplari et sursum extendi ad victoriositatem et triumphalitalem indenegabilem; Virtutes et Virgines experiri et contemplari sive sursum extendi ad fortitudinem indefectibilem; Archangelos et praedicatores experiri et contemplari sive sursum extendi ad claritatem honorabilem: Angelos Ecclesiae et electos communes experiri et contemplari sive sursum extendi ad libertatem delectabilem ; homines et mulieres et pueros salvatos tantum meritis Crucifixi experiri et contemplari et sursum extendi ad securitatem interminabilem. Pro his omnibus et de his omnibus scribitur Isaiae quinquagesimo in persona omnis caelestis militiae simul: Dominus Deus mane, supple: aeternitatis beatae, erigit mihi aurem, intellectivae et affectivae, ut audiam, id est, percipiam realiter, quasi, id est vere, magistrum, docentem unumquemque ordinem Angelorum et Beatorum omnia supra dicta. E contrario diabolus docet in inferno contraria et deprimit ad contraria.

In terra vero sive in Ecclesia militanti docet: summos pontifices, cardinales et episcopos et praelatos alios, quomodo divino cultui, zelo et honori principaliter intendant et populis sibi commissis verbo, exemplo, suffragio sive oratione incessanter provideant.

Sacerdotes et omnes altaris ministros, quomodo Deum prae oculis habeant et castitati et laudi divinae et saluti animarum subserviant.

Religiosos et Religiosas, quomodo Ordinem ament, honestatem monstrent, veritatem servent.

Magistros et doctores et praedicatores, quomodo divina et aeterna proferant et promoveant et ea quae ad caelestia elevant, doceant.

Imperatores et reges et principes terrarum et dominos, quomodo alium esse Dominum universalem cognoscant, iustitiam diligant, misericordiam foveant, sanctitatem colant et pietatem in omnibus ostendant.

Milites, quomodo ad caelestem militiam tendant, caelesti militiae vacent et in omnibus ad caeli milites ut ad speculum suum (oculum) habeant.

Iudices et notarios et consiliarios, quomodo veritati faveant, falsitatem odio habeant, oculum ad Deum praemittant.

Mercatores et artifices, quomodo sint fideles in animo, veraces in verbo, sobrii in lucrando, propitii in eleemosynas faciendo.

Divites, ut pro Deo eleemosynas faciant et a Deo recognoscatur.

Pauperes, ut patientiam habeant et ad voluntatem Dei attendant.

Dominos, ut modeste agant.

Subditos, ut fideliter subiaceant.

Servos, ut humiliter subministrent. - Viros, ut ordinate convivant.

Uxores, ut obedienter se habeant.

Virgines, ut se mundas custodiant.

Viduas, ut devotioni se iungant.

Medicos, ut condescendant.

Infirmos, ut ad peccata sua et caelestia praemia oculum habeant.

Sanos, ut statum suum recognoscant.

De quibus omnibus et pro quibus omnibus scribitur Isaiae quadragesimo octavo : Ego Dominus Deus tuus, docens te utilia, gubernans te in via, qua ambulas: et Ioannis tertio: Rabbi, scimus, quia a Deo venisti magister; et Matthaei vigesimo secundo: Magister, scimus, quia verax es et viam Dei in veritate doces etc.