Sermo XXI .

Item, sermo fratris Bonaventurae editus Assisii coram Fratribus in Capitulo, prima Dominica de Adventu.

Induimini Dominum Iesum Christum, ad Romanos decimo tertio .

Sacer Apostolus, sacro spiratus afflamine, in hoc devote tempore Salvatoris adventus in his verbis modis omnibus congruentibus quibus potest, inducit, movet, monet et inflammat fideles ad conformitatem animae, linguae, vitae, famae et mortis cum

Iesu. Eapropter sciendum, quod induit, inviscerat et incorporat sibi quis Dominum Iesum suo modo imitando eum per contemptum vanitatis mundanae, spernendo scilicet quae ipse spernit: divitias, delicias et honores; ad Ephesios quarto : Induite novum hominem, qui secundum Deum creatus est in iustitia et sanctitate veritatis.

Per gemitum devotionis abundae, afficiendo scilicet se circa ea, circa quae ipse se alliciebat, scilicet circa zelum animarum, circa cultum caelestium, circa studium spiritualium unctionum; ad Colossenses tertio : Exspoliantes vos veterem hominem cum actibus suis et induentes novum eum , qui renovatur in agnitionem secundum imaginem eius qui creavit illum.

Per habitum honestatis praeclarae, conservando scilicet motus animae et corporis, linguae et sensitivae, et regulando sub legibus rationis et subiiciendo legibus aeternis; ad Ephesios sexto : State succincti lumbos vestros in veritate et induti loricam iustitiae et calceati pedes in praeparatione Evangelii pacis, in omnibus sumentes scutum fidei etc.

Per amplexum caritatis geminae, amando scilicet ea quae ipse amavit; ad Colossenses tertio : Induite vos sicut electi Dei, sancti et dilecti, viscera misericordiae, benignitatem, humilitatem, modestiam, patientiam etc.