Sermo IV .

Item, sermo fratris Bonaventurae editus eadem tertia Dominica in Conventu Viterbiensi, praesente curia Romana ibidem.

Ego vox clamantis in deserto: Dirigite viam Domini, Ioannis primo .

Venerabilis Baptista et sacro spiratus afflamine duo facit maxime in verbis istis: primo enim ostendit sui ministerii humillimum conditionem; secundo exprimit eiusdem saluberrimam formam sive exsecutionem. Quantum ad primum vocat se instrumentum tantum; Glossa : " Vox Verbi incarnati clamantis in me", in populo Iudaeorum a Deo propter peccatum deserto; quantum ad secundum dicit: Dirigite viam Domini.

I. Quantum ad primam partem sciendum, quod sacer et sanctificatus Praecursor fuit sua vita et doctrina et fama et gratia veraciter vox sanctitatis et munditiae, quia praedicabat baptismum paenitentiae; Psalmus : Vox Domini super aquas, Deus maiestatis intonuit, Dominus super aquas multas.

Vox suavitatis et laetitiae, quia praedicabat adventum Christi, personae desideratae; Canticorum octavo : Amici auscultant, fac me audire vocem tuam.

Vox libertatis et amicitiae, quia praedicabat annum benignitatis et gratiae; Proverbiorum octavo: O viri, ad vos clamito, et vox mea ad filios hominum.

Vox veritatis et iustitiae, quia praedicabat severitatem divinae irae; Iob trigesimo septimo : Tonabit Deus in voce sua mirabiliter.

Vox amoenitatis et gloriae, quia praedicabat regnum felicitatis aeternae; Canticorum secundo : Sonet v ox tua in auribus meis; vox enim tua dulcis et facies tua decora.

Vox claritatis et elegantiae, quia predicabat mores et opera observantiae novae; Proverbiorum octavo: Nunquid non sapientia clamitat, et prudentia in plateis dat vocem suam?

II. Quantum ad secundam partem dicitur: Dirigite viam Domini, primo, per perfectam ad Dominum conversionem; Proverbiorum vigesimo tertio : Dirige in via animum tuum; Ieremiae trigesimo primo: Dirige cor tuum in viam rectam.

Secundo, per paenitentiae integram exsecutionem; Proverbiorum quarto : Dirige semitam pedibus tuis, et omnes viae tuae stabilientur.

Tertio , per mandatorum perseverantem observationem; Proverbiorum undecimo : Iustitia simplicis diriget viam eius; Ecclesiastici secundo: Dirige viam tuam et spera in illum.

Quarto, per virtutum et gratiarum et donorum et beatitudinum et Sacramentorum intellectum verum et perceptionem; Psalmus : Utinam diligantur viae meae ad custodiendas iustificationes tuas!

Quinto, per orationis sanctae suspensionem sive mentis elevationem; Proverbiorum decimo quinto : Vir prudens dirigit gressus suos.

Sexto, per cordis pietatem et compassionem; Genesis vigesimo quarto : Mittet Angelum suum tecum et diriget viam tuam.

Septimo, per devotionis sacrae unctionem; Ieremiae decimo : Scio, Domine, quia non est hominis via eius, nec viri est, ut ambulet et dirigat gressus suos; Proverbiorum vigesimo: A Domino diriguntur gressus viri; quis autem hominum intelligere potest viam suam?

Octavo, per honestae vitae conversationem; Genesis vigesimo quarto : Domine Deus domini mei Abraham, si direxisti viam meam, in qua nunc ambulo; Psalmus: Dirige me in veritate tua; infra: Docebit mites vias suas.