Sermo IV .

Item, sermo fratris Bonaventurae coram Universitate, in domo Fratrum.

Qui aedificat in caelo ascensionem suam et fasciculum suum super terram fundavit, Amos nono .

Inter alias solemnitates Ecclesiae haec singularem habet praerogativam, quia aliae sunt viatorum, ista est comprehensorum simul et viatorum , quia in ea Christus sua praesentia laetificat civitatem caelestem et sua influentia laetificat Ecclesiam militantem. Eapropter ista solemnitas dupliciter hic describitur, et primo, quantum ad suam praesentiam in hierarchia caelesti; secundo, quantum ad suam influentiam in hierarchia subcaelesti. Primum, ibi:

Qui aedificat in caelo ascensionem: secundum, ibi: et fasciculum suum super terram fundavit. Sicut enim se habet hortus paradisi ad comparationem fasciculi, sic se habet gaudium illius Ecclesiae ad istam: ideoque signanter dicitur: Qui aedificat etc, quia, sicut Christi resurrectio est causa nostrae resurrectionis, sic eius ascensio est causa et exemplar nostrae ascensionis. Ipse enim est scala contingens, immo penetrans caelos per sublime Divinitatis, et contingens terram per limum nostrae carnis. In hac scala disponuntur omnes ascensiones spirituales et omnes perfectiones et glorificationes et dona gratiae et gloriae. Unde in hac scala dicuntur Angeli ascendere et descendere supra Filium hominis, Ioannis primo : et haec est significata Genesis vigesimo octavo, ubi Iacob ad visionem eius elevatus fuit.

I. Aedificavit autem ascensionem suam Dominus Iesus supernae civitatis restaurando decorem, et secundum hoc sunt quinque gradus in hac scala. Etenim ascendendo supernae Ierusalem patefecit ingressum ; Michaeae secundo : Ascendet, pandens iter ante eos, in illam requiem etc.

Supernae matris redintegravit numerum ;- ad Ephesios quarto: Ipse est et qui ascendit super omnes caelos, ut impleret omnia.

Supernae civitatis accumulavit solatium: Psalmus: Ascendit Deus in iubilo et Dominus in voce tubae.

Supernae beatitudinis sublirnavit et stabilivit imperium: Psalmus : Regna terrae, cantate Deo etc., qui ascendit super caelum caeli ad orientem.

Supernae felicitatis derivavit influxum: ad Ephesios quarto: Ascendens in altum, captivam duxit captivitatem, dedit dona hominibus.

II. Humanae infirmitatis renovando virtutem, ex quo sequitur... secundum illud primi Regum decimo quarto : Ascendit Jonathas, manibus et pedibus

reptans, et armiger eius, id est humana infirmitas, post eum, per quinque gradus, scilicet per sinceritatem innocentiae; Psalmus: Quis ascendet in montem Domini etc. Innocens manibus et mundo corde.

Per sanctitatem pudicitiae; Isaiae undecimo: Flos de radice eius ascendet.

Per sublimitatem confidentiae; Genesis quadragesimo sexto : Iuncto Ioseph curru suo, ascendit obviam patri suo.

- Per suavitatem benevolentiae; Canticorum tertio: Ascensum purpureum media caritate constravil.

- Per stabilitatem perseverantiae; Ecclesiastici quadragesimo sexto: Dedit Dominus ipsi Caleb fortitudinem etc, ut ascenderet in excelsum terrae locum. - Hi quinque gradus sunt contra omne malum. Sinceritas innocentiae ordinat ad proximum, sanctitas pudicitiae ad se ipsum, sublimitas confidentiae ad Deum, suavitas benevolentiae ad omne bonum, stabilitas perseverantiae contra omne malum. III. Diabolicae crudelitatis refrenando tyrannidem, secundum illud Isaiae sexagesimo tertio : Quis est iste qui venit de Edom? Ego, qui propugnator sum ad saluandum. Confregit autem Christus diabolum per humilitatem, de qua fecit nobis scalam ad ascendendum per quinque gradus. Etenim informavit in in-carnatione ad humilitatem condescendentiae, per quam conculcavit diaboli arrogantiae; Psalmus: Inclinavit caelos et descendit et ascendit super Cherubim et volavit.

In baptizatione ad humilitatem perfectae iustitiae, per quam conculcavit diaboli astutias: Ioannis tertio, ubi agit de baptismo: dicit: Et nemo ascendit in caelum, nisi qui descendit de caelo, Filius hominis, qui est in caelo.

In tentatione ad humilitatem cautelae, per quam enudavit diaboli fraudulentias: primi Regum decimo quarto : Ascendit Ionathas, manibus et pedibus reptans, et armiger eius post eum.

In conversatione ad humilitatem disciplinae, per quam effugavit diaboli blanditias: Habacuc tertio: Ingrediatur putredo in ossibus meis etc, ut ascendam ad populum accinctum nostrum.

In passione ad humilitatem tolerantiae, per quam confregit diaboli potestatem: Psalmus: Qui ascendit super occasum, Dominus nomen illi: Canticorum septimo : Ascendam in palmam et apprehendam fructum eius.