Sermo XVI.

Item, sermo fratris Bonaventurae editus coram Fratribus Parisius in Capitulo, Dominica quarta de Adventu in mane.

Sic nos existimet homo ut ministros Christi et dispensatores mysteriorum Dei, primae ad Corinthios quarto .

Volenti divini verbi fructum ex auditu et affatu percipere tria sunt necessaria secundum Dionysium de caelesti Hierarchia , scilicet devotio affectus; divinus enim radius non relucet nisi spiritualibus.

Captivatio intellectus; abundantius enim et amplius Deus se manifestat humilibus.

Religio caelibatus; Sapientia enim aeterna maxime a mundis acceptat amari et possideri. Ut igitur ista tria in nobis habere per haec Dei verba valeamus etc..

Sic nos existimet etc.

Apostolus Spiritu sancto plenus et animarum zelo succensus hortatur his verbis omnes servos

Dei et in eis omnes Christianos subditos ad duo, scilicet ad devotum cultum evangelicae religionis et strenuum studium ecclesiasticae pietatis. Primum respicit Deum, ibi: Sic nos existimet homo ut ministros Christi; secundum proximum, ibi: et dispensatores mysteriorum Dei.

I. Sciendum ergo, quod qui vult esse minister Christi et reputari debet habere munditiam cordis quantum ad affectum; Psalmus : Ambulans in via immaculata, hic mihi ministrabat.

Sapientiam mentis quantum ad intellectum; Proverbiorum decimo quarto : Acceptus est regi minister intelligens.

Prouidentiam oris quantum ad eloquium; primae ad Timotheum quarto: Haec proponens fratribus, bonus eris minister Christi Iesu.

Excellentiam operis quantum ad exercitium; secundae ad Timotheum quarto : Tu vero vigila, in omnibus labora, opus fac evangelistas, ministerium tuum imple; secundae ad Timotheum secundo: Labora sicut bonus miles Christi Iesu.

Famam laudis quantum ad praeconium; secundae ad Corinthios sexto : In omnibus exhibeamus nosmetipsos sicut Dei ministros, ut non vituperetur ministerium nostrum.

Elegantiam conversationis quantum ad convictum; primae ad Timotheum tertio : Qui enim bene ministraverint gradum bonum sibi acquirent.

Excedentiam affectus quantum ad desiderium; Psalmus : Qui facis Angelos tuos spiritus et ministros tuos ignem urentem.

II. Quantum ad secundum nota, quod ad hoc, quod possint aestimari dispensatores mysteriorum Dei, debent dispensare ut dispensatores fideles et prudentes temporalia pauperibus fideliter; primae ad Corinthios quarto : Hic iam quaeritur inter di spensat ores, ut fidelis quis inveniatur; Lucae duodecimo: Quis , putas, est fidelis dispensator et prudens, quem constituit Dominus super familiam suam, ut det illis in tempore tritici mensuram?

Sacramenta fidelibus liberaliter; primae Petri quarto : Unusquisque, sicut accepit gratiam, in alterutrum illam administrantes, sicut boni dispensatores multiformis gratiae Dei.

Verba Dei cunctis hominibus veraciter; primae ad Corinthios nono : Dispensatio mihi credita est etc, ut, Evangelium pr aedicans , sine sumtu ponam Evangelium; secundae ad Corinthios tertio: Qui et idoneos nos fecit ministros novi Testamenti, non littera, sed spiritu.